Samarqandning Bulung‘ur tumanida ikkita maktabning o‘quvchi qizlari o‘zaro mushtlashishdi. Holat aks etgan video ijtimoiy tarmoqlarda tarqaldi.
Viloyat IIB matbuot xizmatining ma’lum qilishicha, holat 25-aprel kuni soat 16:30 larda Bulung‘ur tumani markazida joylashgan “Diyor” sport majmuasi maydonida yuz bergan.
Bulung‘ur tuman XTBga qarashli 22 va 23-sonli umumtaʼlim maktablarining 8-sinfida tahsil olayotgan o‘quvchi qizlarning bir-birlariga nisbatan turli haqoratli so‘zlar aytgani natijasida janjalli holat yuzaga kelgan.
Janjal tuman IIB tomonidan rasmiylashtirilib, hozirda tergovga qadar tekshiruv harakatlari olib borilmoqda.
Xabarda ta’kidlanishicha, tekshiruv yakunlariga ko‘ra ushbu holat maktablarning jamoasi hamda ota-onalari ishtirokida muhokama qilinishi belgilangan.
O‘quvchi qizlar janjali
Bir necha kun oldin Toshkent shahri Yangihayot tumanida ikki qiz boshqa bir qizni “samosud” qilgani haqida xabar berilgan edi. Holat yuzasidan Jinoyat kodeksining 277-moddasi (bezorilik) bilan jinoyat ishi qo‘zg‘atilgan. Shu kabi voqea Toshkentning Shayxontohur tumanida ham yuz berdi. Tumandagi 82-maktab 7-sinf o‘quvchisi to‘rt nafar dugonasi bilan birga mazkur maktabning 8-sinf o‘quvchisi bo‘lgan qizni do‘pposlagan hamda tasvirga olingan videoni o‘zining Instagram dagi sahifasiga joylab tarqatgan. Ushbu holat yuzasidan ham jinoyat ishi qo‘zg‘atilgan.
Izoh (0)