Ижтимоий тармоқларда “мактаб ўқувчи қизлари синфдошини самосуд қилмоқда” сарлавҳаси остида видеолавҳа тарқатилди. Хоразм вилояти Мактабгача ва мактаб таълими бошқармаси ҳолат вилоятнинг Янгиариқ туманида содир бўлганини маълум қилди.
Хоразм вилояти мактабгача ва мактаб таълими бошқармаси ишчи гуруҳи ҳамда тегишли ташкилот вакиллари иштирокида ўрганилганда видеолавҳада акс этган воқеа 15 ноябрь куни Хоразм вилояти Янгиариқ туманидаги 17-сон умумий ўрта таълим мактабининг 7-синф ўқувчилари ўртасида катта танаффус пайтида содир бўлгани аниқланган.
Шу куни улар ўртасидаги ўзаро келишмовчилик ва жанжал бошқа бир синфдош қиз томонидан тасвирга олиниб, ижтимоий тармоққа жойланган.
Ушбу вазият туман ИИБ ходимлари томонидан муҳокама қилиниб, профилактика инспекторлари томонидан Маъмурий жавобгарлик тўғрисидаги кодекснинг 47-моддаси 1-қисми бўйича маъмурий баённома расмийлаштирилган.
Келгусида шу каби ҳолатлар содир этилишининг олдини олиш мақсадида вилоят мактабгача ва мактаб таълими бошқармаси, туман ИИБ, маҳалла фуқаролар йиғини фаоллари ҳамкорлигида жанжалда иштирок қилган ўқувчилар ҳамда уларнинг ота-оналари иштирокида профилактик суҳбат ўтказилиб, тушунтириш ишлари олиб борилган.
Изоҳ (0)