Ўзбекистоннинг Иорданияга янги тайинланган фавқулодда ва мухтор элчиси Нодиржон Турғунов ушбу мамлакат подшоҳи Абдуллоҳ II бин ал-Ҳусайнга ишонч ёрлиқларини топширди, деб хабар қилмоқда “Дунё”.
Унга кўра, Уммон шаҳридаги Басман қасрида бўлиб ўтган тантанали маросимдан сўнг бўлиб ўтган мулоқот аввалида мамлакат элчиси Ўзбекистон президентнинг Иордания подшоҳига йўлланган саломларини етказди.
Подшоҳ Абдуллоҳ II бин ал-Ҳусайн мамлакат раҳбарига миннатдорлик билдириб, янги тайинланган элчига муваффақиятлар тилади ҳамда икки қардош юртни боғлаб турувчи тарихий ришталарни янада мустаҳкамлаш ва сифат жиҳатидан янги босқичга олиб чиқишга умид билдирди.
Шунингдек, Иордания томонининг элчи фаолиятида мазкур дўстона алоқаларни янада мустаҳкамлаш йўлида ҳар қандай кўмак кўрсатилиши таъкидланди.
Ўзбекистон ва Иордания ўртасида дипломатик муносабатлар 1993 йил 15 февралда ўрнатилган.
Ўзбекистоннинг Иорданияга янги тайинланган элчиси Нодиржон Турғунов 28 май куни ушбу мамлакат Ташқи ишлар ва хориждаги ватандошлар билан ишлаш вазирлиги бош котиби Мажид ал-Қатарнага ишонч ёрлиқлари нусхаларини топширди.
Нодиржон Турғунов 2024 йил март ойида Ўзбекистоннинг Саудия Арабистонидаги элчиси сифатида Ар-Риёз шаҳрига келган эди. Шунингдек, у 2024 йил ноябрь ойида Ўзбекистоннинг Ислом ҳамкорлик ташкилотидаги доимий вакили сифатида аккредитациядан ўтган. 2025 йил апрель ойида эса у бир вақтнинг ўзида мамлакатимизнинг биринчи элчиси сифатида Баҳрайн Ташқи ишлар вазирлигига ишонч ёрлиқлари нусхаларини топширган эди.
Изоҳ (0)