Фариддин Насриев Ўзбекистоннинг Эрондаги фавқулодда ва мухтор элчиси этиб тайинланди, деб хабар беради “Дунё” агентлиги.
Тайинловга қадар у 2018-2023 йиллар давомида Ўзбекистоннинг Қозондаги Бош консуллигига раҳбарлик қилган. 42 ёшли Фариддин Насриев Тошкент молия институти ва Тошкент давлат юридик университетини тамомлаган.
Меҳнат фаолиятини 1999 йилда банк тизимида бошлаган ва 2003 йилдан буён Ташқи ишлар вазирлигининг турли тузилмаларида, жумладан, Бельгия ва НАТОдаги ваколатхоналарида фаолият юритган. Ташқи ишлар вазирлигининг Консуллик-ҳуқуқий департаментида у 3-котибликдан директор ўринбосаригача бўлган поғонани босиб ўтган.
Инглиз, француз, рус ва форс тилларида гаплаша оладиган Фариддин Насриев 2015-2023 йиллар давомида Теҳрондаги элчи лавозимида ишлаб келган Баҳодир Абдуллаевнинг ўрнини эгаллади.
Октябрь охирларида Ўзбекистон ташқи ишлар вазири Бахтиёр Саидов Эроннинг Ўзбекистондаги янги тайинланган элчиси Муҳаммад Али Искандарийнинг ишонч ёрлиқлари нусхаларини қабул қилгани тўғрисида хабар берилганди.
Изоҳ (0)