Ўзбекистоннинг янги тайинланган Фавқулодда ва мухтор элчиси Абат Файзуллаев 30 сентябрь куни Австрия президенти Александр Ван дер Белленга ишонч ёрлиқларини топширди, деб хабар бермоқда «Dunyo» АА.
Маросим «Hofburg» саройида бўлиб ўтган. Тадбирда Австрия президентининг ташқи сиёсат ва ҳарбий масалалар бўйича маслаҳатчилари, Ташқи ишлар вазирлиги бош котиби ва бошқа расмий шахслар иштирок этган.
«Суҳбат чоғида Президент Александр Ван дер Беллен Австрия томони Президент Шавкат Мирзиёев раҳбарлигида Ўзбекистонда амалга оширилаётган изчил ўзгаришлар ва кенг кўламли ислоҳотлардан яхши хабардорлигини таъкидлади. Сўнгги йилларда Европа ва бутун дунёда Ўзбекистоннинг обрўси ошиб бормоқда.
Президент Австрия—Ўзбекистон муносабатларининг бугунги ижобий динамикасини юқори баҳолар экан, савдо-инвестициявий ва маданий-гуманитар соҳалардаги ўзаро ҳамкорликни янада такомиллаштириш зарурлигига алоҳида тўхталди», — дейилади хабарда.
Эслатиб ўтамиз, 2020 йил 19 август куни элчи Абат Файзуллаев Австрия Ташқи ишлар вазирлигига ишонч ёрлиқлари нусхаларини топширган эди. Дипломатик протоколга кўра, Ўзбекистон элчиси Австрия президентига ишонч ёрлиқларининг асл нусхасини тақдим этган пайтдан бошлаб ўз вазифаларини бажаришга тўлиқ киришган ҳисобланади.
Абат Файзуллаев 29 июль куни Олий Мажлис Сенати Кенгашининг қарори билан Ўзбекистоннинг Австриядаги элчиси этиб тайинланганди. Тайинловдан олдин Абат Файзуллаев вазирнинг ёрдамчиси – Ташқи ишлар вазирлигининг ташкилий ва назорат бўлими бошлиғи бўлиб ишлаган.
Абат Файзуллаев Ўзбекистоннинг Австриядаги собиқ элчиси, Ўзбекистоннинг Европада хавфсизлик ва ҳамкорлик ташкилоти ҳамда Венадаги бошқа халқаро ташкилотлардаги доимий вакили Шерзод Асадовнинг ўрнини эгаллайди. Шерзод Асадов шу йилнинг март ойида ташқи ишлар вазирининг ўринбосари этиб тайинланган эди.
Изоҳ (0)