Ўзбекистоннинг Португалияга янги тайинланган элчиси (қароргоҳи Парижда жойлашган) Нодир Ғаниев ушбу мамлакат президенти Марселу Ребелу де Соузага ишонч ёрлиқларини топширди, деб хабар бермоқда “Дунё” ахборот агентлиги.
Қайд этилишича, “Белем” саройида бўлиб ўтган расмий маросимдан сўнг кечган мулоқот чоғида Португалия президенти икки мамлакат ўртасидаги муносабатлар ҳолати ва истиқболларини юқори баҳолади. Шунингдек, сиёсий, савдо-иқтисодий, маданий-гуманитар соҳаларида ҳамкорликни мустаҳкамлаш масалаларига алоҳида эътибор қаратилди.
Ўзбекистон ва Португалия ўртасида дипломатик муносабатлар 1992 йил 12 августда ўрнатилган.
Нодир Ғаниев бир вақтнинг ўзида Ўзбекистоннинг Франциядаги элчиси ҳам ҳисобланади. У 2024 йил 17 сентябрь куни Франция президенти Эммануэл Макронга ишонч ёрлиқларини топширганди. Ундан аввал Ўзбекистоннинг Швециядаги элчиси лавозимида ишлаб келган.
Аввалги элчи Сардор Рустамбоев 2018 йилдан 2024 йилгача Франция ва Португалияда элчи лавозимида фаолият юритган. 2024 йил январь ойида у Ҳиндистонга элчи этиб тайинланган.
Изоҳ (0)