Ўзбекистон элчиси Амирсаид Аъзамхўжаев Польша президенти Анжей Дудага ишонч ёрлиқларини топширди, деб хабар бермоқда “Дунё” ахборот агентлиги.
Хабарга кўра, тақдимот маросими Польша раҳбарининг расмий қароргоҳи — Варшавадаги Белведере саройида бўлиб ўтди.
Расмий маросим доирасида бўлиб ўтган суҳбат чоғида Польша президенти барча соҳаларда икки томонлама ҳамкорликни янада фаоллаштиришдан манфаатдор эканини тасдиқлади. Польша Ўзбекистонни Марказий Осиёдаги муҳим ва истиқболли ҳамкор деб билиши, мамлакатда амалга оширилаётган кенг кўламли ва ортга қайтмас ислоҳотларни ҳар томонлама қўллаб-қувватлаши алоҳида таъкидланди.
Қайд этилишича, сўнгги йилларда Ўзбекистон-Польша ҳамкорлиги, айниқса, савдо-иқтисодий соҳада сезиларли даражада мустаҳкамланиб, янги ва амалий мазмун билан тўлдирилди. Польша ишбилармон доираларида ўзбекистонлик ҳамкорлар билан алоқаларни ривожлантиришга қизиқиш ортиб бормоқда. Икки томонлама муносабатларни сифат жиҳатидан янги босқичга кўтариш учун салмоқли салоҳият мавжуд.
Польшалик генерал Владислав Андерснинг аскарлари дафн этилган масканни обод этиш бўйича кўрилаётган чора-тадбирлар учун Ўзбекистон ҳукуматига миннатдорлик билдирилди.
Ишонч ёрлиқлари топширилгандан сўнг элчи Варшавадаги Номаълум аскар қабрига гулчамбар қўйиш маросимида қатнашди.
Изоҳ (0)