O‘zbekistonning Iordaniyaga yangi tayinlangan elchisi Nodirjon Turg‘unov 28-may kuni ushbu mamlakat Tashqi ishlar va xorijdagi vatandoshlar bilan ishlash vazirligi bosh kotibi Majid al-Qatarnaga ishonch yorliqlari nusxalarini topshirdi, deb xabar qilmoqda “Dunyo” axborot agentligi.
Qayd etilishicha, suhbat chog‘ida O‘zbekiston-Iordaniya munosabatlarini jadallashtirish, shuningdek, BMT, Islom hamkorlik tashkiloti kabi xalqaro tashkilotlar doirasidagi o‘zaro hamkorlik masalalari muhokama qilindi. Siyosiy muloqotni kengaytirish istiqbollari, jumladan, turli darajadagi o‘zaro tashriflarni tashkil etish va qo‘shma tadbirlar, xususan, Tashqi ishlar vazirliklari o‘rtasida siyosiy maslahatlashuvlar va hukumatlararo komissiya majlislarini o‘tkazish orqali muhokama qilindi.
Tomonlar savdo-iqtisodiy hamkorlikni rivojlantirish, jumladan, ishbilarmon doiralar o‘rtasidagi aloqalarni faollashtirish va qo'shma sarmoyaviy loyihalarni amalga oshirishdan o‘zaro manfaatdorlik bildirdi. Iqtisodiy diplomatiyani faol ilgari surish bo'yicha aniq takliflar ko‘rib chiqildi. Madaniy-gumanitar aloqalarni kengaytirish, sayyohlik almashinuvini ko'paytirishga alohida e’tibor qaratildi.
O‘zbekiston va Iordaniya o‘rtasida diplomatik munosabatlar 1993-yil 15-fevralda o‘rnatilgan.
Nodirjon Turg‘unov 2016-yildan beri Tashqi ishlar vazirligi tizimida. O‘tgan yillar davomida Tashqi ishlar vazirligining Konsullik-huquqiy departamentida turli lavozimlarda faoliyat olib borgan. 2019—2021-yillarda O‘zbekistonning Oqtov shahrida (Qozog‘iston), 2021—2024-yillarda esa Jidda shahrida (Saudiya Arabistoni) bosh konsul bo‘lib ishlagan.
2024-yil mart oyidan buyon O‘zbekistonning Saudiya Arabistonidagi elchisi hisoblanadi. Shuningdek, u 2024-yil noyabridan O‘zbekistonning Islom hamkorlik tashkilotidagi doimiy vakili. 2025-yil aprelida esa u bir vaqtning o‘zida O‘zbekistonning birinchi elchisi sifatida Bahrayn Tashqi ishlar vazirligiga ishonch yorliqlari nusxalarini topshirgan edi.
Izoh (0)