31 январь куни вазифасини бажарувчи Бахтиёр Саидов Словакиянинг элчиси этиб тайинланган Виктор Борецкийни қабул қилди. Бу ҳақда ТИВ ахборот хизмати хабар қилди.
Қайд этилишича, учрашув давомида Словакия дипломатик ваколатхона раҳбарининг ишонч ёрлиқлари нусхасини топшириш маросими бўлиб ўтган. Саидов элчини лавозимга тайинлангани билан табриклаб, Ўзбекистон—Словакия муносабатларини мустаҳкамлаш йўлида фаолият ҳамда муваффақиятлар тилаган.
Музокаралар доирасида иқтисодий дипломатияни фаол ривожлантиришга ўзаро тайёрлик тасдиқланган. Савдо-иқтисодий ҳамкорлик бўйича Ўзбекистон—Словакия идоралараро комиссиясининг мажлисини ўтказиш зарурлиги қайд этилган.
Элчи расмий Братислава Ўзбекистоннинг Жаҳон савдо ташкилотига аъзо бўлиш жараёнида, шунингдек, Ўзбекистон билан Европа Иттифоқи ўртасида кенгайтирилган шериклик ва ҳамкорлик тўғрисида битим тузишни жадаллаштиришда қўллаб-қувватлашини билдирган.
Маданий-гуманитар алоқаларни мустаҳкамлаш юзасидан ҳам фикр алмашилган. Қўшма тадбирлар ва юқори даражадаги ўзаро ташрифларнинг ташкилий жиҳатлари муҳокама қилинган.
Изоҳ (0)