Флорида штатининг Полк шаҳрида боғ қайчиси билан қуролланган фуқаро аллигатордан қутилганидан бир неча дақиқа ўтиб полиция томонидан отиб ташланган. Бу ҳақда МyTwinTiers нашри хабар бермоқда.
Воқеа 26 май, душанба куни юз берган. Полк округи аҳолиси полицияга ғалати хатти-ҳаракатли эркак аллигаторлар тўла кўлда сузаётганини хабар қилган. Гувоҳлар унга қутқарув ҳалқасини ташлаб, ёрдам бермоқчи бўлган, аммо эркак уларга қараб ириллаган.
Сўнгра у танасида аллигатор тишларининг излари кўриниб турган ҳолда кўлдан чиққан ва боғдорчилик қайчиси билан уйлар орасида изғиб юрган. Шунингдек, у ғишт билан юк машинасини бузишга уринган.
Полициячилар етиб келгач, эркак қайчи билан уларга ташланган. Уни икки марта электрошокер билан урган ҳолда тинчлантиришга ҳаракат қилишган, бироқ бу таъсир қилмаган. Қоидабузар полиция машинасининг йўловчи ўриндиғига чиқиб, шерифнинг қуролини тортиб олмоқчи бўлган. Шундан сўнг шериф ёрдамчилари эркакка қарата ўт очишган. Жароҳатлар ҳаёт учун хавфли бўлиб чиққан.
Таъкидланишича, ҳалок бўлган шахс 42 ёшли Тимоти Шулс бўлиб, у тақиқланган моддаларни истеъмол қилгани учун аввал ҳам икки марта қамалган.
Изоҳ (0)