“Энди давлат фуқаролик хизматчисини ноқонуний бўшатиш раҳбарга жуда қимматга тушади” — ҳуқуқшунос

Ноқонуний бўшатишлар натижасида давлат органларидан ундирилган суммалар бирма-бир сарҳисоб қилинади. Бу ҳақда меҳнат ҳуқуқи бўйича мутахассис Саидали Мухторалиев “Дарё”га маълум қилди.

Ҳуқуқшуноснинг тушунтиришича, “Давлат фуқаролик хизмати тўғрисида”ги қонуннинг 51-моддасида (давлат фуқаролик хизматчиси фаолиятининг қонунга хилоф равишда тугатилиши оқибатлари) шундай дейилган:

➖ Давлат фуқаролик хизмати лавозимига тикланган давлат фуқаролик хизматчисига унинг фаолияти қонунга хилоф равишда тугатилгани туфайли етказилган зарарнинг ўрни Ўзбекистон Республикаси Давлат бюджети маблағлари ҳисобидан қопланади.

➖ Давлат фуқаролик хизматчиси фаолиятининг қонунга хилоф равишда тугатилишида айбдор бўлган шахс қонунда белгиланган тартибда жавобгар бўлади. Давлат фуқаролик хизматчиси фаолиятининг қонунга хилоф равишда тугатилиши билан боғлиқ зарарнинг миқдори айбдор шахсдан регресс тартибида ундирилади.

Бу нормалар фаол ҳолатга кирган экан, энди ноқонуний бўшатишлар натижасида давлат органларидан ундирилган суммалар бирма-бир сарҳисоб қилинади. Бюджетдан ундирилган ҳар бир сўм ва ҳар бир тийин айбдор шахсларнинг чўнтагидан регресс тартибда қайта ундириб олинади, деди ҳуқуқшунос.

Давлат фуқаролик хизматига оид муҳим ўзгаришлар

Президентнинг давлат фуқаролик хизматига доир фармонига мувофиқ 2026 йил 1 январдан бошлаб давлат хизматчилари лавозим маоши уларнинг иш тажрибаси, илмий ва малака даражаси, натижадорлиги ҳамда бошқа кўрсаткичлардан келиб чиқиб шакллантирилади.

Яна бир муҳим ўзгартириш — давлат хизматига биринчи марта қабул қилинган давлат хизматчилари билан меҳнат шартномаси дастлаб бир йил муддатга тузилади ва кейинчалик фаолиятининг ижобий натижаларига кўра меҳнат шартномаси номуайян муддатга узайтирилади.

Миллий даражадаги давлат органлари фуқаролик хизмати лавозимларининг реестри тасдиқланди. Эндиликда, яъни 20 июндан бошлаб давлат фуқаролик хизматчисига ўртача ойлик иш ҳақининг 30 фоизидан кўп бўлмаган миқдорда жарима қўлланилади.

Коррупцияга қарши курашиш агентлигининг маълум қилишича, давлат хизматчисининг совға билан боғлиқ талабларга риоя этилмаганлик учун жавобгарлиги масаласи кўриб чиқилмоқда.