АҚШ Федерал қидирув бюроси (ФҚБ) шу ҳафта Нью Йорк фонд биржаси биносини портлатиб юборишни режалаштирган Флорида штатида яшовчи 30 ёшли эркакни қўлга олди. Бу ҳақда CBS News телеканали хабар берди.
Махсус хизматлар февраль ойида Ҳорун Абдул Малик Янир исмли эркакда портловчи қурилмалар ясаш бўйича кўрсатмалар борлиги ҳақида маълумот олгандан сўнг тергов бошлаган. Тергов натижасида у Нью Йорк фонд биржаси биноси ҳақида маълумот тўплагани, портлатиш қурилмаси учун деталлар сотиб олгани ва “Қўшма Штатлар ҳукуматини қайта ишга тушириш” учун биржани портлатиб юборишни режалаштиргани аниқланган.
ФҚБ маълумотларига кўра, ўтган ҳафта ҳибсга олинган шахс аудио ёзиб, режалаштирилган ҳужум сабабларини тушунтирган ва “ўзини (Ал-Қоида собиқ раҳбари) Усама бен Ладендай ҳис қилаётганини” айтган. Эркак ИШИД террорчилик гуруҳига ҳам қўшилмоқчи бўлган, бироқ улар “мақсадларига эриша олмаслиги” туфайли режасини ўзгартирган.
- Сўнгги ойларда АҚШда диққатга сазовор жойларга ҳужум қилиш билан боғлиқ бир нечта ҳибсга олиш ҳолатлари кузатилди. ФҚБ октябрда сайлов куни террористик ҳужум уюштиришни режалаштирган Афғонистон фуқаросини ҳибсга олди.
- Қидирув бюроси август ойида Эронга алоқадор бўлган Покистон фуқаросини АҚШ ҳукумати амалдорлари ва сиёсатчиларни пул эвазига ўлдириш режасини тузишда айблаб қамоққа олганди.
Изоҳ (0)