Туркия Ташқи ишлар вазирлиги Греция ва Исроил элчихоналарига, шунингдек, Европа Иттифоқи делегациясига дипломатик нота юборди. Бу ҳақда Tengrinews хабар берди.
Унда айтилишича, ушбу мамлакатлар томонидан EuroAsia Interconnector лойиҳаси доирасида яратилаётган электр тармоғи Туркиянинг сувли ҳудудларидан ўтади. Лойиҳанинг кўргазмали ҳужжатлари шуни кўрсатдики, режалаштирилган сувости электр кабели йўналиши Туркиянинг Шарқий Ўрта Ер денгизидаги континентал майдонини ўз ичига олади.
Туркия ушбу давлатларнинг ҳар қандай хатти-ҳаракатлари фақат Анқаранинг розилиги билан амалга оширилиши кераклигини билдирди ва тегишли дипломатик тузилмаларга норозилик нотасини юборди. Нотада кабел ётқизилишидан олдин дастлабки тадқиқотлар ўтказиш ва бунинг учун рухсат олиш кераклиги, агар тадқиқотга зарурат бўлмаса, бу ҳақда Анқарани белгиланган тартибда хабардор қилиш лозимлиги қайд этилган.
Туркия матбуотидаги хабарларга кўра, Анқаранинг бундай ҳаракати 8 март куни Кипр, Греция ва Исроил ўртасида имзоланган битимга жавобан қилинган.
Маълумот учун, 2020 йил охирида Европа Иттифоқи Ўрта Ер денгизи минтақасидаги хатти-ҳаракатлари сабабли Туркияга қарши оғир санкциялар жорий қилиш тўғрисида қарор қабул қилган эди.
Аввалроқ Россия президенти Владимир Путин ва Туркия президенти Ражаб Тоййиб Эрдўғон видеоконференцалоқа режимида Туркиядаги «Аккую» атом электр станциясининг (АЭС) учинчи энергия блоки қурилишига старт берган эди. Туркия президенти станциянинг сўнгги блокини қуриш 2022 йилга режалаштирилганини маълум қилган.
Шунингдек, Франция президенти Эммануэль Макрон Эрдўғонга ярашиб олиш таклифини билдириб, хат йўллагани ҳақида хабар берилганди. Туркия ТИВ раҳбарининг таъкидлашича, Эрдўғон Макроннинг мактубига ижобий муносабат билдирган.
Изоҳ (0)