Асад режимини ағдарган коалиция етакчиси Абу Муҳаммад ал-Жулонийга кўра, мамлакат келгуси тўрт йил ичида сайловлар ўтказади. У, шунингдек, янги конституция лойиҳасини ишлаб чиқиш уч йилгача вақт олиши мумкинлигини айтди. Суриянинг де-фаcто раҳбари бу ҳақда Саудия Арабистони давлат телерадиокомпаниясига берган интервьюсида маълум қилган.
Сурияликлар кескин ўзгаришларни кўриши учун тахминан бир йил вақт кетади, деди ал-Жулоний.
Суриянинг амалдаги раҳбари ҲЦҲ каби гуруҳлар “миллий мулоқот конференциясида тарқатиб юборилишини” айтди.
“Албатта. Мамлакатни гуруҳлар ва милиция менталитети билан бошқариб бўлмайди”, деди у бу ҳақдаги саволга жавоб берар экан.
Жулоний АҚШ дастаги билан Сурия шимоли-шарқини эгаллаб турган курдлар масаласида ҳам изоҳ берди. У барча томонлар, жумладан, Сурия демократик кучлари (SDF) билан ҳам музокаралар олиб борилаётганини айтди.
“Биз Суриянинг Курдистон ишчилар партияси (ПКК) учун Туркияга қарши ҳужумлар уюштириш платформасига айланишига қаршимиз”, деди у қуроллар фақат мудофаа вазирлиги ихтиёрида бўлиши кераклигини таъкидлаб.
Сурия қуролли мухолифати томонидан кутилмаганда бошланган ҳужум 13 йилдан бери давом этаётган қонли можаро ва ярим асрлик сулола бошқарувига якун ясади. Бу Асад режимининг узоқ йиллик иттифоқчилари Россия, Эрон ва “Ҳизбуллоҳ” позициялари заифлашган вақтга тўғри келди.
Асад режимига қарши коалицияни бошқарган “Ҳайъат Таҳрир аш-Шом” жангари гуруҳи БМТ, Қўшма Штатлар, Россия, Туркия ва бошқа давлатлар томонидан террорчи ташкилот сифатида тан олинган. Унинг етакчиси Жулоний ҳақидаги маълумот учун яқин кунларгача 10 миллион АҚШ доллари мукофот амал қилаётганди.
Суриянинг янги раҳбарияти режим иқтидорда бўлган вақт жорий қилинган халқаро санкцияларни бекор қилишга эришмоқчи. Жулоний бу борада АҚШнинг сайланган президенти Дональд Трамп маъмуриятига умид билдиряпти.
Изоҳ (0)