Россия президенти Владимир Путин ва Туркия президенти Ражаб Тоййиб Эрдўғон видеоконференцалоқа режимида Туркиядаги «Аккую» атом электр станциясининг (АЭС) учинчи энергия блоки қурилишига старт берди, деб ёзади «РБК».
«Россия ва Туркия мутахассислари — атомшунос олимлар, муҳандислар, ишчиларнинг мувофиқлаштирилган саъй-ҳаракатлари атом электр станцияси қурилишини келишилган жадвал бўйича таъминлашга имкон бераётганидан мамнунлигимни билдирмоқчиман», — деди Путин.
Россия президенти, шунингдек, коронавирус пандемияси ҳам лойиҳани амалга оширишга халақит бера олмаганини таъкидлади.
Туркия президенти, ўз навбатида, станциянинг сўнгги блокини қуриш 2022 йилга режалаштирилганини маълум қилди.Маълумот учун, «Аккую» — Ўрта Ер денгизи соҳилидаги Мерсин вилоятида жойлашган ВВЭР-1200 реакторлардан иборат тўрт блокли атом электр станцияси. Атом электр станциясини қуриш тўғрисидаги битим 2010 йил май ойида имзоланган, аммо қурилиш ишлари 2018- йилга келибгина бошланган.
Ўшанда Эрдўғон биринчи энергия блокини ётқизиш жараёнини «тарихий лаҳза» деб атаган ва АЭС тўлиқ қувватга етган тақдирда, Туркиянинг электр энергияга бўлган эҳтиёжи 10 фоиз қопланиши ҳамда мамлакатнинг газ ва кўмирга қарамлиги камайишини таъкидлаган.
Изоҳ (0)