Turkiyaning amaldagi konstitutsiyasi harbiy to‘ntarish natijasi bo‘lib, mamlakatning demokratik tamoyillariga to‘g‘ri kelmaydi. Bu haqda Turkiya yetakchisi Rajab Toyyib Erdo‘g‘on Turkiya Davlat kengashining 156 yilligiga bag‘ishlangan tadbirda ma’lum qildi.
Erdo‘g‘on Turkiyaning yangi “fuqarolik konstitutsiyasi”ni qabul qilish zarurligini yana bir bor ta’kidladi: “Afsuski, biz haligacha mamlakatga aholi tomonidan tayyorlangan yangi konstitutsiyani bera olmadik. Biz Turkiya Respublikasi tashkil topganining 100 yilligini harbiy to‘ntarish oqibatida yuzaga kelgan, mamlakatimizning demokratik tamoyillariga to‘g‘ri kelmaydigan konstitutsiya bilan nishonladik”, — dedi prezident.
Unga ko‘ra, mamlakatdagi ayrim siyosiy kuchlar iqtisodiy va ijtimoiy muammolarni aytib, yangi konstitutsiya masalasini kun tartibidan olib tashlashga harakat qilmoqda. Biroq yangi konstitutsiya fuqarolik siyosati ko‘lamini kengaytirib, shu orqali iqtisodiyotdan tortib ijtimoiy hayotgacha bo‘lgan barcha sohalardagi muammolarni hal qilishni tezlashtiradi, deya qo‘shimcha qildi u.
Turkiyaning amaldagi konstitutsiyasi harbiy to‘ntarishdan ikki yil o‘tib, 1982-yil 7-noyabrda qabul qilingan. Turkiyaning amaldagi hukumati “to‘ntarish” deb atalmish konstitutsiyani “fuqarolik” konstitutsiyaga o‘zgartirishni o‘zining asosiy maqsadlaridan biri sifatida tilga olmoqda.
Izoh (0)