Туркиянинг амалдаги конституцияси ҳарбий тўнтариш натижаси бўлиб, мамлакатнинг демократик тамойилларига тўғри келмайди. Бу ҳақда Туркия етакчиси Ражаб Тоййиб Эрдўғон Туркия Давлат кенгашининг 156 йиллигига бағишланган тадбирда маълум қилди.
Эрдўғон Туркиянинг янги “фуқаролик конституцияси”ни қабул қилиш зарурлигини яна бир бор таъкидлади: “Афсуски, биз ҳалигача мамлакатга аҳоли томонидан тайёрланган янги конституцияни бера олмадик. Биз Туркия Республикаси ташкил топганининг 100 йиллигини ҳарбий тўнтариш оқибатида юзага келган, мамлакатимизнинг демократик тамойилларига тўғри келмайдиган конституция билан нишонладик”, — деди президент.
Унга кўра, мамлакатдаги айрим сиёсий кучлар иқтисодий ва ижтимоий муаммоларни айтиб, янги конституция масаласини кун тартибидан олиб ташлашга ҳаракат қилмоқда. Бироқ янги конституция фуқаролик сиёсати кўламини кенгайтириб, шу орқали иқтисодиётдан тортиб ижтимоий ҳаётгача бўлган барча соҳалардаги муаммоларни ҳал қилишни тезлаштиради, дея қўшимча қилди у.
Туркиянинг амалдаги конституцияси ҳарбий тўнтаришдан икки йил ўтиб, 1982 йил 7 ноябрда қабул қилинган. Туркиянинг амалдаги ҳукумати “тўнтариш” деб аталмиш конституцияни “фуқаролик” конституцияга ўзгартиришни ўзининг асосий мақсадларидан бири сифатида тилга олмоқда.
Изоҳ (0)