Эрон парламенти мамлакатнинг ядровий фаолиятини тиклаш бўйича лойиҳанинг умумий қоидаларини маъқуллади. Бу ҳақда Fars агентлигига таяниб «РИА Новости» хабар берди.
Парламент, шунингдек, лойиҳанинг айрим қоидаларини ҳам кўриб чиқиши тахмин қилинмоқда. Бундан ташқари, ратификация қилиш учун Эронда қонун лойиҳаларини текширадиган Конституция ҳимоячилари кенгашининг розилиги ҳам талаб қилинади. Шундан сўнг қонун ижро этиш учун мажбурий бўлади.
Эслатиб ўтамиз, 2020 йилнинг январида мамлакат 2015 йилда эришилган ядровий келишувдан тўлиқ чиқишини эълон қилди. Ҳужжатни бир томондан Эрон, бошқа томондан халқаро воситачилар олтилиги — АҚШ, Россия, Хитой, Буюк Британия, Франция ва Германия имзолаган эди. Ҳужжатда, жумладан, Эрон уранни қайси даражагача бойитиши ва қанча миқдорда бойитилган уран сақлаши мумкинлигини белгилаб берарди. Даражалар шундай ўрнатилган эдики, бунда Эрон ядровий энергетикани ривожлантириши мумкин эди, бироқ ядровий қурол ярата олмасди. Келишув шартларига риоя этиш эвазига Эронга қарши санкциялар бекор қилинган эди.
Янги қонун лойиҳасида Эронда йилига 120 килограмм уранни 20 фоизга бойитиш билан уран ишлаб чиқариш ва тўплаш (20 фоиздан юқори уран қурол даражасида ҳисобланади), шунингдек, ойига камида 500 килограмм кам бойитилган уран ишлаб чиқариш кўзда тутилган. Айни пайтда Эрон уранни «ядро шартномаси»да назарда тутилган 3,67 фоиз ўрнига 4 фоиздан юқори даражада бойитмоқда.
Бундан ташқари, Аракдаги 40 МВт оғир сув реакторини «ядро келишуви»дан аввалги ҳолатига қайтариш ҳам кўзда тутилган. Келишув Аракдаги мавжуд реакторни радиоизотоплар ишлаб чиқариш учун қайта лойиҳалашни назарда тутади, шунда у қурол даражасидаги плутонийни ишлаб чиқармайди.
Ҳужжат, шунингдек, ҳукуматга МАГАТЭ (Халқаро атом энергияси агентлиги) билан қўшимча хавфсизлик протоколи доирасидан чиқувчи ядро иншоотларига кириш ҳуқуқини тўхтатиб қўйиш мажбуриятини юклайди.
Мамлакатда ядро фаолиятини тиклаш бўйича қонун лойиҳасини тезкор асосда кўриб чиқиш Эрон ядро дастури раҳбари деб аталган ядрошунос олим Муҳсин Фахризода ўлдирилганидан сўнг юз бермоқда. У 27 ноябрь куни Теҳрондаги касалхонада вафот этди. Воқеадан сўнг Эрон президенти хавфсизлик чораларини кучайтириш ҳақида топшириқ берди.
Ғарб ОАВларининг ёзишича, Муҳсин Фахризода масофадан бошқарилган қурол орқали ўлдирилган. Эрон ўлдирилган ядро физиги учун қасос олишга ваъда берди. Туркия минтақада тинчликни бузмасликка чақирди.
Изоҳ (0)