Ўзбекистон Суперлигаси 10-турида “Навбаҳор” сафарда “Бунёдкор” устидан 3:2 ҳисобида ғалабага эришди.
Учрашувнинг 10-дақиқасида “Бунёдкор” ҳисобни очди – Имеда Ашортия пенальтини аниқ амалга оширди. Аммо 17-дақиқада “Навбаҳор” ҳам пенальти тепди, бироқ Забиҳилло Ўринбоев имкониятдан фойдалана олмади. Орадан икки дақиқа ўтиб, 19-дақиқада Русланбек Жиянов ўзига берилган имкониятни қўлдан чиқармай, ҳисобни тенглаштирди – 1:1.
Биринчи бўлим сўнгида “Бунёдкор” яна олдинга чиқиб олган эди, бироқ VAR орқали гол бекор қилинди.
Иккинчи бўлимда “Навбаҳор” тўлиқ устунликни қўлга олди. 65-дақиқада Русланбек Жиянов дубль қайд этиб, жамоасини олдинга олиб чиқди. Орадан етти дақиқа ўтиб, Шоҳмалик Комилов ҳам рақиб дарвозасини ишғол қилди ва ҳисобни 3:1 кўринишига келтирди.
Учрашув якуни арафасида Луис Качорри “қалдирғочлар”нинг 2-голини киритди, лекин бу “Бунёдкор”ни мағлубиятдан қутқариб қололмади.
Мазкур ғалабадан кейин “Навбаҳор” очколари сонини 17 тага етказиб олди. Улар онлайн турнир жадвалида “Бунёдкор”ни ортда қолдириб, 4-поғонага кўтарилиб олди. Тошкентликлар эса 16 очко билан 5-ўринга тушиб кетди.
Ўзбекистон Суперлигаси
10-тур
18 май, якшанба
“Бунёдкор” — “Навбаҳор” 2:3
Голлар: 1:0 — Ашортия (10), 1:1 — Жиянов (19), 1:2 — Жиянов (65), 1:3 — Комилов (72), 2:3 — Качорри (90+9)
Изоҳ (0)