Суперлига жорий йилги мавсумининг 1-тур учрашувида Наманганнинг “Навбаҳор” жамоаси ўз майдонида Самарқанднинг “Динамо” жамоасини қабул қилди.
Учрашувнинг дастлабки дақиқалариданоқ ҳар икки жамоа фаол ҳаракат қилди. 9-дақиқада меҳмонлар бурчак зарбасини амалга оширди, бироқ мезбонлар дарвозабони Умиджон Эргашев ишончли ўйнади. 11-дақиқада “Навбаҳор” аъзолари ҳам бурчак зарбасини амалга ошириб, рақиб дарвозасини ишғол қилишга уриниб кўрди.
58-дақиқада “Навбаҳор” таркибида илк ўзгариш юз берди – бразилиялик ҳужумчи Педро ўрнини Забиҳилло Ўринбоевга бўшатиб берди. Шунингдек, 73-дақиқада Жавоҳир Абдужабборов ва Русланбек Жиянов ўрнига Комилжон Тожидинов ва Аббосжон Ғуломов майдонга тушди.
Учрашувнинг энг муҳим вазиятларидан бири қўшимча дақиқаларда содир бўлди. 90+5-дақиқада бош ҳакам Равшан Абдувоҳидов “Навбаҳор” дарвозасига 11 метрли жарима зарбасини белгилади. Меҳмонлар футболчиси Анваржон Ҳожимирзаев пенальтини амалга оширди, бироқ унинг зарбаси ноаниқ чиқди.
Шу тарзда Намангандаги ўйинда томонлар ҳисобни очишга муваффақ бўлмади ва учрашув 0:0 ҳисоби билан якунланди.
“Дарё” “Навбаҳор” ва “Динамо” жамоалари ўртасидаги ўйиндан фотогалерея тайёрлади.
Изоҳ (0)