Эрон президенти Масъуд Пезешкиённи ўлдиришга урингани учун Исроил товон тўлайди. Бу ҳақда юқори мартабали эронлик мулозим Al Jazeera телеканалига маълум қилди.
Пезешкиённинг ўзи уни ўлдиришга уринишгани ҳақида маълумот берган эди. Суиқасдга уриниш 12 кунлик уруш давомида юз берган. Президент Исроил ҳужумларига жавоб қайтариш юзасидан йиғилиш ўтказаётган бўлган. Исроил учрашув ўтказилаётган жойга зарба беришга уринган.
Оммавий ахборот воситалари авиаҳужум Эрон Олий хавфсизлик кенгаши йиғилиши бўлиб ўтаётган бинога берилганини таъкидлаган. Манбаларга кўра, Исроил бу операцияни “Ҳизбуллоҳ” етакчиси Ҳасан Насруллоҳга уюштирилган суиқасдга ўхшаш усулда амалга оширган.
Исроил самолётлари бинонинг кириш ва чиқиш жойларини нишонга олиб, эвакуация йўлларини тўсиб қўйган. Расмийлар фавқулодда чиқиш эшиги орқали ташқарига чиқишга муваффақ бўлган. Пезешкиён айнан шу ерда оёғидан жароҳат олгани айтилмоқда.
Президентни ўлдиришга уриниш Исроилнинг мамлакатдаги тузумни ағдаришга қаратилган режасининг бир қисми эди, дея таъкидлади эронлик амалдор.
Масъуд Пезешкиён Қўшма Штатларни бу воқеага алоқадор эмас деб ҳисоблайди.
Изоҳ (0)