O‘zbekiston Superligasining 11-turidan o‘rin olgan bahsda Namanganning “Navbahor” jamoasi o‘z maydonida “Qo‘qon-1912” klubini qabul qildi.
Garchi qo‘qonliklar ikki yillik tanaffusdan so‘ng superliga yo‘llanmasini qo‘lga kiritgan bo‘lsa ham, yetakchi jamoalarga munosib qarshilik ko‘rsatib kelmoqda. Sergey Lushan shogirdlari esa so‘nggi o‘yinlarni aʼlo darajada o‘tkazib, g‘alaba qozonib kelmoqda, qolaversa, shu kuni Namanganda xalqaro gullar festivali boshlandi. Shu bois ushbu bellashuvga qiziqish yuqori bo‘ldi.
Ilk daqiqalardan ustunlikni o‘z qo‘liga olishga intilgan “lochinlar” raqib darvozasi oldida xavfli vaziyatlarni yuzaga keltira boshladi. Shunday hujumlarning birida “Navbahor” Ruslanbek Jiyanovning burchakdan havolatib oshirgan to‘pini Igor Gabriel boshi bilan darvozaga aniq yo‘llab, hisobni ochdi – 1:0.
Oradan ikki daqiqa o‘tar-o‘tmas, Alisher Odilovning chap qanotdan mehmonlar jarima maydonchasi ichiga uzatib bergan to‘pini Abbos G‘ulomov darvozaga aniq yo‘llab jamoasini tanaffusga 2:0 hisobida chiqib ketishini taʼminladi.
Ikkinchi bo‘limni hujumkor tarzda boshlagan “Navbahor” vakillari 47-daqiqada penalti ishladi. Penaltini Ruslanbek Jiyanov aniq amalga oshirib, hisobning yirik ko‘rinish olishini taʼminladi – 3:0.
Bahrom Haydarov shogirdlarining navbatdagi qarshi hujumlaridan birida mezbonlar jarima maydonchasi ichida raqib futbolchisiga nisbatan qo‘pollik ishlatgani uchun uchrashuv bosh hakami Temur To‘xtasinov bu safar “Navbahor” darvozasiga 11 metrli jarima zarbasi belgiladi. Biroq penaltidan so‘ng to‘p darvoza ustuniga tegib qaytdi.
Uchrashuvning qolgan daqiqalarida gol urilmadi va mazkur o‘yinda “Navbahor” 3:0 hisobida g‘alaba qozonib, ochkolari sonini 20 taga yetkazib oldi.
“Daryo” “Navbahor” va ““Qo‘qon-1912” jamoalari o‘rtasidagi o‘yindan fotogalereya tayyorladi.
Izoh (0)