Футбол бўйича Ўзбекистон Суперлигасининг сўнгги 26-тур учрашувлари бугун, 30 ноябрь куни бўлиб ўтди.
Мавсум чемпиони “Насаф” бош совринни қўлга киритганидан бери ғалаба нималигини билмаяпти. Ўз уйида аутсайдер “Металлург”ни қабул қилган Қашқадарё клуби кутилмаганда мағлубиятга учради. Ушбу ўйинда ғалаба қозонган бекободликлар сўнгги ўриндан юқорилашга муваффақ бўлди. Энди улар Суперлигада қолиш учун ўтиш ўйинида қатнашади.
“ОКМК” клуби Ойбек Қосимовнинг 78-дақиқада урилган голи эвазига ғалабани ва кумуш медалларини нақд қилди. Олмалиқ клуби ушбу мавсумда 47 очко тўплашга муваффақ бўлди.
“Навбаҳор” ва “Андижон” клуби ўртасидаги учрашув ҳудди кубок финалидек муросасиз ўтди. Учрашувнинг биринчи бўлим сўнгида меҳмонлар ҳисобни очди. Наманган клуби бунга икки гол билан жавоб берди. Рустам Турдимуродов ва Маматказиннинг голи андижонликларни олдинга олиб чиқди. Қўшимча дақиқаларда Русланбек Жияновнинг голи Наманган клубига 1 очко ва бронза медалларини олиб келди. “Андижон” клуби эса мавсумни 9-ўринда якунлайдиган бўлди.
“Нефтчи” клуби “Локомотив” меҳмони бўлди. Учрашув муросасиз ўтди. Сабаби “Локомотив” ўтиш ўйинида қатнашиш учун, фарғоналиклар бронза медаллари учун ғалаба қозониши керак эди. Учрашувнинг асосий дақиқалари дуранг билан якунланди. Ҳакам томонидан қўшиб берилган дақиқаларда Санжар Қодирқулов томонидан киритилган гол “Нефтчи” клуби мусобақада 43 очко билан тугатишига замин яратди. Афсуски, фарғоналикларнинг “Сўғдиёна” ва “Навбаҳор” билан ўзаро ўйинларидаги натижалари ёмон экани сабаб очколари тенг бўлишига қарамай, 5-ўринга жойлашди.
“Динамо” медаллар учун кураш олиб борган “Сўғдиёна” клубини қабул қилди. Учрашувнинг 78-дақиқасида Кожо томонидан киритилган гол самарқандликларга ғалаба келтирди. 43 очкога эга бўлган Жиззах клуби ўзаро ўйинлардаги натижалар сабаб, 4-ўринга жойлашди.
“Пахтакор” дербида “Бунёдкор”га мағлуб бўлди. Андрия Филипович ва Рашо Момчилонинг голлари ўтган мавсум чемпионларининг мағлубиятини таъминлади.
“Сурхон” клуби “Олимпик”ни йирик ҳисобда мағлуб этди. Ушбу ғалаба Сурхондарё клубининг Суперлигада 7-ўринда якунлашига замин яратди. “Олимпик” эса ўтиш ўйинида қатнашади.
Суперлига
26-тур
30 ноябрь, шанба
“Насаф” — “Металлург” 1:2
Голлар: 1:0 — Шерзод Насруллаев (45+2), 1:1 — Марко Миличкович (45+9), 1:2 — Далер Шарипов (54).
“Навбаҳор” — “Андижон” 3:3
Голлар: 0:1 — Сардор Азимов (45), 1:1 — Жамшид Искандеров (54, пенальти), 2:1 — Йован Жокич (60), 2:2 — Рустам Турдимуродов (62), 2:3 — Ислом Маматказин (73), 3:3 — Руслан Жиянов (90+7).
“Бунёдкор” — “Пахтакор” 2:0
Голлар: 1:0 — Андрия Филиппович (36), 2:0 — Момчило Расо (79).
“Локомотив” — “Нефтчи” 2:3
Голлар: 1:0 — Иван Рогач (12), 2:0 — Сардор Абдунабиев (30), 2:1 — Аббос Ғуломов (39), 2:2 — Билол Тошмирзаев (40), 2:3 — Санжар Қодирқулов (90+2).
Аниқ амалга оширилмаган пенальти: Ҳусайн Норчаев (56, “Нефтчи”).
“ОКМК” — “Қизилқум” 1:0
Гол: 1:0 — Ойбек Рустамов (78).
“Динамо” — “Сўғдиёна” 1:0
Гол: 1:0 — Жоэл Кожо (78).
“Сурхон” — “Олимпик” 3:0
Голлар: 1:0 — Муҳаммадали Абжураҳмонов (35), 2:0 — Беҳруз Шайдулов (61), 3:0 — Абдуғофур Ҳайдаров (90+3).
Четлатиш: Аҳмаджон Анваров (39).
Шундай қилиб, ўтиш ўйинида “Металлург” “Қўқон-1912” билан, “Олимпик” “Шўртан”га қарши Суперлига йўлланмаси учун кураш олиб боради.
Изоҳ (0)