Россия Давлат думаси биринчи ўқишда мигрантлар фарзандларини мактабга қабул қилишда рус тилини билиш учун мажбурий тестдан ўтказишни назарда тутувчи қонун лойиҳасини бир овоздан маъқуллади.
Қонун лойиҳаси якуний маъқулланган тақдирда “Таълим тўғрисида”ги қонуннинг 78-моддаси ўзгартирилади. Лойиҳага кўра, тест синовларидан муваффақиятли ўта олмайдиган болалар ўқишга қўйилмайди.
Шунингдек, Россия ҳудудида ноқонуний равишда бўлганлар мактабга қабул қилинмайди — қабул пайтида қонуний бўлиб турганлигини тасдиқловчи ҳужжат талаб қилинади.
“Қонун лойиҳаси “Россия фуқароларининг таълим олиш ҳуқуқларини ҳимоя қилишни таъминлайди, шунингдек, унинг қулайлиги ва сифатини кафолатлайди”, дея таъкидлади Дума вице-спикери ва қонун лойиҳаси муаллифи Ирина Ярова.
У, агар бола тестдан ўта олмаса, ота-оналар кейинроқ, бола тилни яхшироқ ўзлаштиргач, мактабга қабул қилиш учун ариза билан мурожаат қилишлари мумкинлигини айтган. Ярова таълим очиқ ва бепул бўлиб қолаётгани сабабли, тузатишлар халқаро келишувларга тўлиқ мос келишига ишонч билдирган.
“Мактаб мактабга тайёргарлик билан эмас, балки таълим бериш билан шуғулланади”, дея қўшимча қилган депутат.
Давлат думасининг оилани ҳимоя қилиш, оталик, оналик ва болалик масалалари қўмитаси аъзоси Татьяна Ларионова қонун лойиҳаси муҳокамаси чоғида ишлаш учун келган барча ота-оналар ҳам фарзандларига рус тилини ўқитиш учун тўлов масаласини ҳал қила олмаслигини таъкидлаган.
“Таълим муассасаларига қабул қилинмаган болаларни ўз ҳолига ташлаб қўйиб, уларни кўча-кўйга маҳкум этмаяпмизми? Бу билан ҳуқуқбузарликлар ва ўсмирлар жиноятчилиги ўсиши учун шароит яратиб қўймаяпмизми?”, дея Яровага савол берди у.
Шунингдек, Ларионова иккинчи ўқишга мигрантларни мослаштириш ва интеграция қилиш дастурларини амалга ошириш самарадорлигини ошириш бўйича чора-тадбирларни кўзда тутишни таклиф этди.
Яровая бунга жавобан, меҳнат муҳожирларининг Россияга вояга етмаган болаларини олиб келишлари шарт эмаслигини қайд этди.
“Рус тилини билмайдиганларни таълим олиш учун бир синфга киритмаслик керак, чунки уларнинг мавжудлиги россиялик болаларимизга дастурларни тўлиқ ўзлаштиришга имкон бермайди. Биз ўз болаларимиз, россиялик болалар ҳақида ўйлашимиз керак. Ўқишга тайёрмисиз? Марҳамат, тест топширинг ва ўқинг”, дейди қонун лойиҳаси муаллифларидан бири.
Депутатнинг таъкидлашича, болаларнинг рус тилида таълим олишга тайёрлиги учун жавобгарлик уларнинг ота-оналари зиммасида. Унинг фикрича, агар болалар тил билиш бўйича тестдан ўта олмаса, рус тилини кейинги ўрганиш бепул эмас, балки муҳожирлар ҳисобидан бўлиши керак.
Давлат думасига, шунингдек, Россиядаги барча мактаб ва касб-ҳунар таълимини муҳожирлар учун пуллик қилишни таклиф этувчи қонун лойиҳаси ҳам киритилган.
Изоҳ (0)