Мигрантлар Россияда ишлаб топган маблағларини ўз ватанларига жўнатаётгани сабабли доллар курсини сунъий равишда рағбатлантирмоқда. Бу ҳақда Россия Коммунистик партияси депутати Михаил Матвеев хабар берди.
Россияда меҳнат қилаётган миллионлаб мигрантлар ҳар йили топган маблағларини ватанларига юбормоқда. Бу ўтказмалар бўйича аниқ маълумотлар бир неча йилдан буён яшириб келинмоқда, бироқ мавжуд ахборот ўнлаб миллиард доллар миқдоридаги маблағ ҳақида сўз бораётганини кўрсатмоқда, деди Матвеев.
Унинг сўзларига кўра, 2023 йилда Россиядан Тожикистонга пул ўтказмалари ҳажми 5,7 миллиард долларни ташкил этди, бу мамлакат ялпи ички маҳсулотининг тахминан ярмига тенг. Россиядан Қирғизистонга унинг ялпи ички маҳсулотининг қарийб учдан бир қисмига тенг бўлган маблағ, Ўзбекистонга эса ЯИМнинг 12-15 фоизини (14,5 миллиард доллардан ортиқ) ташкил этувчи пул маблағлари жўнатилган.
Яна Грузия (2 миллиард доллардан ортиқ ўтказмалар), Арманистон (3 миллиард доллардан ортиқ), Қозоғистон ва бошқалар ҳам бор. Бошқача айтганда, мигрантлар ва уларнинг Россиядаги диаспоралари валютага бўлган талабни ва курс ўсишини сунъий равишда рағбатлантириб, ҳар йили банкларимиздан ўнлаб миллиард долларлик валюта сотиб олмоқда, деди депутат.
Шунингдек, у “МДҲнинг кўплаб дўст давлатлари Россия банкларига қарши санкциялар жорий қилгани ва MIR карталари билан ишлашдан бош тортгани, бу эса ушбу давлатларга Россиядан рубль ўтказмаларини қийинлаштиргани”ни айтди.
Бу мигрантларни Россиядан нақд валютани олиб чиқишга мажбур қилмоқда, натижада рубль курсига бўлган босим кучаймоқда, дея қўшимча қилди парламент аъзоси.
Путин рубль қулаши сабабини бошқача изоҳламоқда
Россия президенти Владимир Путин рублнинг қадрсизланиши инфляция даражасининг ошиши билан боғлиқлигини айтган.
Рубль курси билан боғлиқ вазият назорат остида ва ваҳима учун ҳеч қандай асос йўқ, деган Путин.
У валюта қийматининг пасайиши нефть нархларининг ўзгариши билан ҳам боғлиқлигини таъкидлаган. Экспертлар фикрича, яқинда рублнинг сезиларли даражада пасайишига асосий сабаб Россия банкларига қўйилган санкциялар, жумладан, АҚШнинг “Газпромбанк” бошчилигидаги бир қатор банкларни СДН-рўйхатга киритиш тўғрисидаги қарори ва ўтган ёзда нефть нархларининг пастлиги туфайли валюта тушумларининг қисқариши бўлган.
Изоҳ (0)