Марказий Осиё, Кавказорти ва бошқа собиқ совет республикаларидан келган меҳнат муҳожирларига нисбатан ёндашувларни қатъийлаштириш Россиянинг узоқ муддатли манфаатларига мос келмайди. Бу ҳақда Россия ташқи ишлар вазири Сергей Лавров Давлат думасидаги ҳукумат соатида маълум қилди.
Тартиб-интизомни назорат қилиш зарур. Муҳожирлар келадиган бир қатор географик йўналишлар бўйича кўплаб қонунбузарликлар қайд этилган. Биз уларнинг хулқ-атворини назорат қилишни кучайтиришимиз керак. Бироқ тўсиқлар қўймаслик, айниқса виза режимини жорий этмаслик лозим. Мавжуд тартибга нисбатан қўшимча чоралар айнан назоратни кучайтиришга қаратилган, меҳнат миграциясига тўсиқлар яратишга эмас, деди дипломат.
Лавровнинг аниқлик киритишича, Россия ТИВ Евросиё иқтисодий иттифоқига (ЕОИИ) аъзо давлатлар элчилари билан махсус учрашувлар ўтказиб, уларга қонунчилик сиёсатининг моҳиятини тушунтирган.
Буларнинг барчасини энг яқин иттифоқчилар билан муносабатларда қандайдир сунъий тўсиқлар қўймасдан амалга ошириш мумкин, дея таъкидлади Лавров.
Жорий йилнинг 1 январидан бошлаб Россия миграция сиёсатидаги ўзгаришлар кучга кирди, унга кўра хорижликларнинг Россияда визасиз вақтинча бўлиш муддати икки бараварга – йилига жами 180 кундан 90 кунгача қисқартирилди. Бундан ташқари, 5 февралдан бошлаб чегарачиларга мамлакатга киришни рад этиш учун кўпроқ асослар берилди. Хусусан, агар хорижлик шахс Россия хавфсизлигига таҳдид солиши мумкин бўлса, улар бошқа идораларга мурожаат қилмасдан, жойида рад этиш тўғрисида қарор қабул қилишлари мумкин бўлади.
Давлат Думаси 2024 йилда миграция сиёсатини қаттиқлаштирадиган 14 та қонун қабул қилди. Дума спикери Вячеслав Володин миграцияни тақиқлаш режалаштирилмаётганини айтиб, аммо чет эл фуқаролари учун ишлашга рухсат берилган соҳалар сонини чеклаш керак, деган фикрни билдирди.
Тарбия, таълим ва соғлиқни сақлаш — бу мамлакатимиз фуқаролари меҳнат қилиши керак бўлган соҳалар. Уларга муҳожирларни жалб қилишни нотўғри деб ҳисоблаймиз, деган эди у.
Изоҳ (0)