Япония узоқ йиллар давомида урушга қарши қатъий сиёсат юритиб келган. Бироқ Шарқий Осиёдаги хавфли вазиятлар сабаб мамлакат ҳарбий кучларини кучайтирмоқда. Бу ҳақда Bild хабар берди.
Мамлакат мудофаа кучлари аста-секин халқаро вазифаларни бажаришга қодир армияга айланишга интилмоқда.
Япония учта қўшни ядровий давлат — Хитой, Шимолий Корея ва Россиядан таҳдид сезмоқда. Бу борада Хитой, шубҳасиз, асосий хавфсизлик муаммоси ҳисобланади, дейди германиялик таҳлилчи Александра Сакаки.
Унинг сўзларига кўра, сўнгги йилларда Япония ўз ҳарбий кучларини сезиларли даражада мустаҳкамлаган.
Япония ва Хитой ўртасида Шарқий Хитой денгизида ҳудудий низо бор, бу эса исталган пайтда кучайиши мумкин. Токиони Тайван атрофидаги вазият ҳам хавотирга солмоқда. Чунки Тайван энг яқин япон оролидан атиги 110 километр узоқликда жойлашган, дея таъкидлади Сакаки.
АҚШ билан иттифоқлик Япония учун стратегик жиҳатдан биринчи даражали аҳамиятга эга. Японияда тахминан 50 минг нафар америкалик ҳарбий хизматчи жойлаштирилган. Бу бошқа ҳар қандай мамлакатдагидан кўпроқдир.
Япония 2026 йилдан бошлаб Кюшу оролига ракеталарни, Ёнагуни оролига ҳаво ҳужумидан мудофаа тизимларини жойлаштирмоқчи. Тайванга яқин жойлашган Сакишима оролларидан 110 мингдан ортиқ одамни эвакуация қилиш режалаштирилган.
Изоҳ (0)