Koreya Xalq Demokratik Respublikasida mamlakat rahbari Kim Chen In ishtirokidagi yangi esminesni suvga tushirilish marosimida baxtsiz hodisa yuz berdi. Suv sig‘imi besh ming tonna bo‘lgan harbiy kema mas’ul rahbariyatning xatosi tufayli shikastlangan. Bu haqda Koreya Markaziy telegraf agentligi xabar bermoqda.
Marosim 21-may kuni Chxonjin shahrida o‘tkazilgan. Suvga tushirish jarayoni jiddiy texnik nosozlik bilan kechdi: noto‘g‘ri rahbarlik va boshqaruvdagi ehtiyotsizlik tufayli aravachaning parallel harakati ta’minlanmagan. Natijada kemaning quyruq qismi uchun mo‘ljallangan tushirish aravachasi muddatidan oldin stapeldan chiqib ketib, to‘siqqa urilgan. Bu esa muvozanat buzilishiga va kema tubining shikastlanishiga olib kelgan. Kemaning burun qismi esa stapeldan tushmay qolgan.
Voqeani kuzatib turgan Kim Chen In hodisani “oddiy ehtiyotsizlik, mas’uliyatsizlik tufayli sodir bo‘lgan, yo‘l qo‘yib bo‘lmaydigan jiddiy avariya va jinoyat” deb baholagan. U partiya markaziy qo‘mitasining iyun oyidagi plenumiga qadar kemani ta’mirlashni talab qilib, bu “davlat obro‘si” masalasi ekanligini ta’kidlagan.
Uning ta’kidlashicha, plenumda partiya Markaziy qo‘mitasi mudofaa sanoati xodimlari, Kim Chak nomidagi politexnika universiteti, Markaziy kema loyihalash instituti va Chxonjin kemasozlik korxonasi xodimlarining xatolari muhokama qilinadi.
Reuters’ning ta’kidlashicha, KXDR uchun falokat haqida ommaviy bayonot berish kamdan kam uchraydigan hodisa.
Agentlikning yozishicha, “Shimoliy Koreyada ilgari sun’iy yo‘ldoshning muvaffaqiyatsiz uchirilishi va turar joy binosining qulashi kabi falokatlar ro‘y bergan. Keyinchalik bu voqealar mamlakat rahbariyatining muammolarni hal qilishdagi rolini ko‘rsatish uchun foydalanilgan”.
Izoh (0)