Ўзбекистон элчихонаси Ҳиндистонга алдов йўли билан олиб келинган ва одам савдоси қурбонига айланиш хавфи остида қолган аёлга ватанга қайтишига ёрдам кўрсатди, деб хабар қилмоқда “Дунё” ахборот агентлиги.
Қайд этилишича, дипломатик миссия консуллик бўлимига Ҳиндистон ҳуқуқ-тартибот идораларидан Деҳлидаги Индира Ганди халқаро аэропортида руҳий тушкунлик ҳолатидаги З.Т. исмли Ўзбекистон фуқароси аниқлангани ҳақида маълумот келиб тушган.
Шундан сўнг зудлик билан ушбу аёл билан алоқа ўрнатилиб, у элчихонага олиб келинган. Суриштирув жараёнида аниқланишича, З.Т.га С. ва К. исмли кимсалар томонидан Деҳли шаҳридаги ошхоналардан бирида официант бўлиб ишлаш таклифи билдирилган. Бироқ Ҳиндистонга келиб, меҳмонхонага жойлашгач, З.Т. алдов тузоғига тушиб қолганини билиб қолган ҳамда уни ватанга қайтариб юборишларини талаб қилган. Бироқ С. ва К. З.Т.дан унинг учун сарфланган йўл харажатларини қоплаб беришини талаб қилган ҳамда жинсий хизмат кўрсатишга мажбурлашга ҳаракат қилган.
З.Т. ўзи ушлаб турилган маскандан қочиш ва маҳаллий полиция вакилларига мурожаат қилишга эришган.
Ўзбекистон элчихонаси томонидан оғир аҳволга тушиб қолган фуқарога тезкор консуллик-ҳуқуқий ёрдами кўрсатилган ҳамда ҳомий ташкилотлар кўмагида Деҳли—Тошкент йўналишидаги авиарейсга чипта сотиб олинган.
Айни пайтда Ўзбекистон фуқаросини ёлғон ваъдалар билан Деҳлига олиб келиб, эксплуатация қилишга уринишда гумон қилинаётган кимсаларга нисбатан қонуний чора кўрилиши бўйича Ҳиндистоннинг тегишли муассасалари билан ҳамкорлик қилинмоқда.
Дипломатик миссия фуқароларни Ҳиндистонга сафар қилишдан олдин турли шубҳали гуруҳ ёки шахсларнинг ёлғон ваъдаларига алданиб қолмаслик, ушбу мамлакатга кириш ва унда бўлиб туриш чоғида маҳаллий қонунчилик талабларига қатъий риоя қилишга чақирди.
2025 йилнинг март ойида Тошкент вилоятида 5 нафар аёлни шаҳвоний мақсадда Ўзбекистондан олиб чиқмоқчи бўлган шахслар ушланганди. Апрелда Мьянмада одам савдоси қурбони бўлган икки нафар Ўзбекистон фуқароси ватанга қайтарилганди.
Изоҳ (0)