“Исроил ва АҚШ Эроннинг ядровий қурол ишлаб чиқаришига йўл қўймаслик учун ҳамма нарсани қилмоқда” — Нетаняху 

Исроил ва АҚШ Эронда ядро қуроли ва уни етказиб бериш воситалари бўлишига йўл қўймаслик учун ҳамма нарсани қилади. Бу ҳақда Исроил бош вазири Бинямин Нетаняху Қуддусда АҚШ давлат котиби билан қўшма матбуот анжуманида маълум қилди.

“Бизнинг сиёсатимиз ва менинг сиёсатим Эрон ядро қуроли ёки уни етказиб бериш воситаларига эга бўлишига йўл қўймаслик учун қўлимиздан келган барча ишни қилишдан иборат. Бу ўзгаргани йўқ. Лекин, шубҳасиз, АҚШ билан биргаликда ишлаётганимиз ҳам ушбу умумий мақсад учун муҳим аҳамиятга эга”, — деди Исроил ҳукумати раҳбари.

У АҚШ давлат котиби Энтони Блинкен билан хавфнинг олдини олиш бўйича умумий сиёсатни шакллантириш борасида жуда яхши муҳокама ўтказганини айтди.

Нетаняху шунингдек, дунё Теҳрондаги режимнинг ўз халқига нисбатан ваҳшийлигига, шунингдек, Эроннинг ўз чегаралари ва Яқин Шарқ минтақасидан ташқарида босқинчилик олиб бораётганига гувоҳ бўлаётганини таъкидлади. Шу сабабдан ушбу режим ядро қуролига эга бўлмаслиги керак, деган умумий фикр мавжуд, дея таъкидлади Исроил бош вазири.

Эслатиб ўтамиз, 28 январдан 29 январга ўтар кечаси Эронда стратегик объектлар – ҳарбий омборлар, ўқ-дорилар ишлаб чиқариш маркази, авиабаза ва нефтни қайта ишлаш заводларида қатор портлашлар содир бўлди. ОАВ хабарларига кўра, ҳужум ортида Исроил ва АҚШ турган бўлиши мумкин. АҚШ бу портлашларга алоқаси йўқлигини маълум қилди. Исроил эса вазиятга муносабат билдиргани йўқ.