АҚШ ва Исроил Теҳрондаги ядровий ва ҳарбий амбицияларини ушлаб туришнинг янги йўлларини қидираётган бир пайтда Исроил Эрондаги мудофаа мажмуасини нишонга олиб, дронлардан зарба берди. Бу ҳақда АҚШ расмийлари ва операциядан хабардор одамларга таяниб, The Wall Street Journal хабар берди.
Эрон расмийларига кўра, мамлакат ҳаво мудофааси учта кичик квадрокоптер томонидан Эрон космик тадқиқотлар марказига тегишли Исфаҳондаги ўқ-дорилар ишлаб чиқарувчи заводга қаратилган ҳужумининг олдини олган. Эрон ҳаво ҳужумидан мудофаа тизими дронлардан бирини уриб туширган, яна иккитаси омбор устида портлаб, томга озгина зарар етказгани. Эрон ташқи ишлар вазири Ҳусайн Амир Абдуллаҳиён портлашни “қўрқоқлик зарбаси” деб атаган.
“Бундай ҳаракатлар бизнинг мутахассисларимизнинг тинч ядровий тараққиётга бўлган қатъияти ва ниятига таъсир қила олмайди", — деган у.
Исроил ҳарбийлари дрон ҳужумига изоҳ беришдан бош тортган.
WSJ’нинг таъкидлашича, дрон зарбаси Исроил томонидан 2009 йилдан 2021 йилгача бўлган даврда охирги марта Эрон ичида бир қатор операциялар ўтказишга рухсат берган бош вазир Биньямин Нетаньяху бошчилигидаги янги ўта ўнг коалиция ҳукумати остида амалга оширилган биринчи ҳужумдир.
Дрон ҳужуми Исроил ва Америка расмийлари Эроннинг беқарорлаштирувчи операцияларига қарши курашишнинг янги усулларини, жумладан, Россия билан ҳарбий ҳамкорликни чуқурлаштиришни муҳокама қилаётган пайтга тўғри келган.
АҚШ Марказий разведка бошқармаси директори Уилям Бернс ўтган ҳафта Эрон ва бошқа минтақавий муаммоларни муҳокама қилиш учун Исроилга эълон қилинмаган ҳолда сафар қилгани айтилмоқда. АҚШ Давлат котиби Энтони Блинкен 30 январь куни Эрон ва бошқа минтақавий масалалар юзасидан АҚШ-Исроил музокараларини давом эттириш учун Исроилга келиши режалаштирилган.
Ўтган ҳафта АҚШ ва Исроил ҳар икки мамлакатнинг 7500 дан ортиқ ҳарбийларини қамраб олган тарихдаги энг йирик қўшма ҳарбий машғулотларини бошлаган. Исроилнинг юқори даражадаги генерали ўтган ҳафта The Wall Street Journal’га Исроил ва АҚШ энг ёмон сценарийга тайёрланаётганини айтган.
Мавзуга доир:
Изоҳ (0)