АҚШ президенти Дональд Трамп собиқ давлат раҳбари Жо Байден простата саратонига чалинганига муносабат билдирди. У ўз фикрларини Truth Social ижтимоий тармоғида ёзиб қолдирди.
Мелания ва мен Жо Байденнинг яқинда қўйилган тиббий ташхиси ҳақидаги хабардан хафа бўлдик. Биз Жилл ва унинг оиласига энг илиқ ва самимий тилакларимизни билдирамиз, Жога эса тезроқ ва муваффақиятли соғайиб кетишини тилаймиз, деди Трамп.
Саратонга чалинган Байденни у билан бирга ишлаган АҚШ собиқ вице-президенти Камала Ҳаррис ҳам қўллаб-қувватлади. У мазкур хабардан тушкунликка тушганини маълум қилди.
Жо — жангчи ва мен биламанки, у бу чақириқни унинг ҳаёти ва етакчилигини белгилаб берган куч, матонат ва оптимизм билан юз тутади. У тўлиқ ва тезроқ соғайиб кетишига умид қиламиз, деди Ҳаррис.
Маълумот ўрнида, 16 май куни 82 ёшли Байденга простата бези саратонининг агрессив шакли ташхиси қўйилди. Метастазлар аллақачон суякларга ўтган. Ҳозирда собиқ президент ва оиласи шифокорлар билан даволаш усулларини кўриб чиқмоқда.
Простата саратони бўйича мутахассислар фикрича, Байденнинг ташхиси жуда жиддий ва саратон суякларга тарқалиши билан уни даволаб бўлмайди. Шунга қарамай, баъзи шифокорлар саратоннинг бундай шакли билан 10 йилгача яшаш мумкин деб ҳисоблайди.
Байден 1942 йил 20 ноябрда Пенсилвания штатининг Скрантон шаҳрида туғилган. У 36 йил давомида АҚШ Сенатида Делавер штати вакили бўлган. Сўнгра 2009—2017 йилларда Барак Обама маъмуриятида 47-вице-президент лавозимида ишлаган.
Байден 2020 йилдан 2024 йилгача АҚШ президенти сифатида фаолият юритган. 2024 йилги АҚШ президентлик сайловларида Байден дастлаб иккинчи муддатга номзодини қўйишни режалаштирган, бироқ кейинроқ пойгадан чиқишини эълон қилганди.
Изоҳ (0)