“Қўшма Штатлар Фаластин давлатини тан олиш ниятида эмас” — АҚШ вице-президенти

АҚШ вице-президенти Жей Ди Венс Вашингтон Фаластин давлатини тан олишни режалаштирмаётганини таъкидлади. Бу ҳақда у 8 август куни Буюк Британия ташқи ишлар вазири Девид Лемми билан учрашув чоғида маълум қилди.

Британия журналистларининг саволларига жавоб берар экан, Венс Лондоннинг сентябрь ойида Фаластинни давлат сифатида тан олиш режасига шундай муносабат билдирган:

“Ғазода функсионал ҳукумат йўқлиги боис, бундай тан олиш нимани англатишини тушунмаяпман. Агар Яқин Шарқда тинчлик ўрнатиш осон бўлганида, бу иш аллақачон бажарилган бўларди”.

Журналистлар Венсдан Исроилнинг Ғазо шаҳрини эгаллаш режалари ҳақида Трамп олдиндан хабардор қилинганми, деб сўраган. Вице-президент эса бу борада изоҳ бермаслигини таъкидлаган.

Лондон ва Вашингтон ўртасида бир нечта баҳсли масалалар мавжуд

Учрашувда АҚШ ва Британия ўртасида икки асосий глобал мавзу — Россия—Украина уруши ҳамда Исроил ва ҲАМАС ўртасидаги зиддият бўйича ёндашувлар фарқланаётгани аён бўлган. Шу билан бирга, Британия томонидан пўлат ва алюминий экспорти бўйича Вашингтон билан савдо музокаралари давом этмоқда.

Путин—Трамп учрашуви ва Украина

Россия президенти Владимир Путин 7 август куни Трамп билан келаси ҳафта учрашишга умид қилаётганини маълум қилинганди. Сўнгра улар ўртасида Аляскада 15 август куни юзма-юз учрашув бўлиши эълон қилинганди. Трамп, асосан, Путин билан бевосита музокараларга урғу бераётган бўлса, Британия бош вазири Кир Стармер ва бошқа Европа етакчилари урушни тўхтатиш музокараларига Украина ҳам бевосита жалб қилиниши шарт деб ҳисоблайди.

Жей Ди Венс ва Девид Лемми: сиёсий қарама-қаршиликларга қарамай дўстона алоқалар

Жей Ди Венс ва Девид Лемми — турли сиёсий қарашларга эга бўлса-да (Венс — Трамп тарафдори бўлган консерватив республикачи, Лемми — меҳнаткаш синф вакили бўлган лейборист), улар шахсий жиҳатдан яқин муносабат ўрнатишга муваффақ бўлган.

Лемми The Guardian нашрига берган интервьюсида шундай деган:

“Иккаламиз ҳам қийин болалик даврини бошдан кечирганмиз. Венс менга ва Ангела Рейнерга жуда яқин инсон сифатида муносабатда бўлади”.

Эслатиб ўтамиз, Лемми 2025 йил бошида Вашингтонда Венснинг уйига ташриф буюрган. Кейинчалик улар май ойида Римда Папаси Лев XIVънинг инаугурацияси чоғида яна учрашган.