Эстония ҳарбий-денгиз кучлари халқаро денгиз қонунларини бузиб, Болтиқ денгизида байроқсиз сузаётган танкерни қўлга олди. У Россиянинг “соя флоти” таркибига кирувчи кемалардан бири деб гумон қилинмоқда. Бу ҳақда Эстония бош вазири Кристен Михал ижтимоий тармоқдаги саҳифасида хабар берди.
“Бугун эрталаб Эстония денгиз флоти ҳеч бир давлат байроғисиз ҳаракатланаётган ва санкцияга тушган кемани тўхтатди. Ҳозирда тегишли идоралар бортга чиқиб, унинг ҳуқуқий мақомини ва хавфсизлик ҳолатини текширмоқда”, деб ёзган сиёсатчи.
Кема илгари Жибутида рўйхатдан ўтказилгани қайд этилган бўлса-да, ҳеч бир мамлакат байроғисиз ҳаракатланган. Бу эса халқаро қонунларни бузиш ҳисобланади. Кема Таллин кўрфази яқинида қўлга олинган. Амалиётга вертолётлар жалб этилган.
Эстония оммавий ахборот воситалари хабарига кўра, танкер Россиянинг Болтиқ денгизидаги асосий нефть экспорт порти — Уст Лугага йўл олган эди.
Россия Болтиқ денгизида юзлаб байроқсиз, ҳужжатсиз ва шубҳали танкерларни ўз ичига олган “соя флоти”ни бошқариши айтилади. Ғарб давлатларига кўра, бу нефть-газ маҳсулотларини санкцияларни четлаб ўтган ҳолда экспорт қилиш имконини беради.
Эстония чегара хизмати вакили Вейко Коммусаар воқеага қуйидагича изоҳ берди:
“Сўнгги бир йил ичида Финляндия қўлтиғида ҳужжатлари йўқ кўплаб кемалар пайдо бўлди. Аниқ айтиш мумкинки, бу Россия соя флотининг бир қисмидир”.
Ғарб давлатлари бундай ноқонуний кемаларга қарши курашни кучайтирган. Ҳатто айрим ҳолларда уларни чўктириш варианти ҳам муҳокама қилинмоқда.
Эстония парламенти шу ҳафта ҳарбий-денгиз кучларига тижорат кемаларига қарши “ҳарбий куч ишлатиш” имконини берувчи қонунни қабул қилди. Бу чора мамлакатнинг денгиз тубидаги муҳим инфратузилмасига таҳдид солувчи кемаларга қарши қаратилган.
2023 йилнинг декабрида Финляндия ҳукумати яна бир байроқсиз танкерни ҳибсга олган эди. У Эстония ва Финляндияни боғловчи сувости электр линиясига зарар етказишда гумон қилинган.
Изоҳ (0)