“Дарё” нашри 27 декабрда Ўзбекистон ва жаҳонда содир бўлган энг муҳим воқеаларни эътиборингизга ҳавола этади.
Россия ва Украина томонлари кесишаётган ҳудудларда ҳарбийлар аҳволи оғирлигича қолмоқда
Украина президенти Владимир Зеленский Донбассдаги вазият Украина ҳарбийлари учун оғирлигича қолаётганини айтди.
“Бахмут, Кременная ва Донбассдаги бошқа ҳудудлар ҳозир максимал куч ва концентрацияни талаб қилмоқда. У ерда аҳвол қийин, оғриқли”, — деди у.
Бахмут Донецкдан 60 км шимолда жойлашган. Россия Мудофаа вазирлиги ва ДХР расмийлари декабрь ойи бошидан бери шаҳар ҳудудидаги ҳужумлар ҳақида хабар бериб келмоқда. Аввал Зеленский Бахмутдаги жангларни мамлакат Қуролли кучлари учун “қайноқ ва энг оғриқли” жанглардан бири сифатида баҳолаганди. 20 декабрь куни Зеленский шаҳарга ташриф буюриб, уни мудофаа қилаётган Украина ҳарбийлари билан учрашди.
Кременная шаҳри Северодонецк вилоятида ЛХР ғарбида жойлашган. Россия армияси апрель ойида уни назорат остига олгани ҳақида хабар берган эди. Кременная яқинида бир неча ойдан бери жанглар давом этмоқда.
Туркия жараёнга узоқ вақт тўсқинлик қилмайди, Швеция ва Финляндия 2023 йилда НАТОга қўшиладими?
Швеция ва Финляндия 2023 йил охиригача НАТОга аъзо бўлади. Бу ҳақда Шимолий Атлантика алянси бош котиби Енс Столтенберг маълум қилди.
Шу билан бирга, НАТО бош котиби аниқ саналарни айтмади, бироқ унинг фикрича, Туркия жараёнга узоқ вақт тўсқинлик қилмайди ва бу икки мамлакатнинг НАТОга қўшилиш протоколларини ратификация қилади.
Швеция Ташқи ишлар вазири Тобиас Биллстрём 21—22 декабрь кунлари Анқарага ташриф буюриб, Туркия ташқи ишлар вазири Мевлут Чавушўғли билан учрашганди.
Эслатиб ўтамиз, 19 декабрь куни Швеция Олий суди журналист Булент Kenesнинг Туркияга экстрадициясини тўхтатган. Чавушўғли бу қарорни “ўта салбий” деб атаган.
Журналист ва Курд ишчилар партиясига алоқадор шахсларнинг экстрадиция қилиниши Швециянинг НАТОга аъзо бўлишини тасдиқлаш бўйича Туркия талабларидан бири.
Айни вазиятда, Чавушўғли Биллстрём билан ўтказган матбуот анжуманида “Швеция келишувларнинг ҳали ярмини ҳам амалга оширмаган”ини айтди.
Хитой коронавирусга нисбатан “нол бардошлилик”сиёсатини норозилик акциялари сабаб тўхтатди. Бунинг салбий натижаси эса сир тутилмоқда
Хитой 8 январдан мамлакатга кириб келувчилар учун карантинни бекор қилади. Бу ҳақда Reuters ХХР Соғлиқни сақлаш миллий комиссиясига таяниб хабар бермоқда.
Хитой қарийб уч йил мобайнида коронавирусга нисбатан “нол бардошлилик” сиёсатига амал қилиб, аҳоли учун қатъий чеклов чораларини, шу жумладан, оммавий локдаунларни сақлаб келди. 2022 йил ноябрида бу катта кўламли норозилик акцияларини келтириб чиқарди, шундан кейин Хитой ҳукумати коронавирусга қарши чораларни бекор қила бошлади.
Чекловларнинг юмшатилиши, афтидан, касалланиш ҳолатлари кескин кўпайишига олиб келди. 20 декабрь кунининг ўзида 37 миллион киши, декабрь бошидан буён эса — 250 миллион киши коронавирусга чалинди, деб ёзган эди Bloomberg 23 декабрь куни Соғлиқни сақлаш миллий комиссияси ёпиқ мажлисида айтилган маълумотларга таяниб.
25 декабрдан бошлаб комиссия коронавирус бўйича кунлик маълумотларни эълон қилишни тўхтатди. Улар 2020 йил январидан буён ҳар куни эълон қилиниб келарди, у ердаги рақамлар жуда кичрайтирилган деб ҳисобланиларди.
Масалан, 20 декабрь куни маълумотномада коронавирусга чалиниш билан боғлиқ бор-ёъғи уч мингта янги ҳолат ҳақида айтилганди (Bloomberg версиясига кўра — 37 миллионта ҳолат).
Айни пайтда Bloomberg таҳлилларига кўра, Хитойда коронавируснинг жорий тўлқини январь ойида энг чўққисига чиқади.
Ҳуқуқий эксперимент тариқасида жорий этиладиган “Маҳалла бюджети” тизими аҳолига қандай фойда олиб келади?
Ўзбекистонда солиқларни ундириш кўрсаткичи паст бўлган туманларда “Маҳалла бюджети” тизими ҳуқуқий эксперимент тариқасида жорий этилади.
Бу ҳақда “Маҳалла бюджети” тизимини жорий этиш орқали маҳаллаларнинг молиявий имкониятини янада кенгайтириш бўйича қўшимча чора-тадбирлар тўғрисида”ги президент қарорида белгиланди.
Мазкур туманларда мол-мулк ва ер солиғи (нотурар жойлар бўйича мол-мулк ва ер солиғи бундан мустасно) бўйича ундирилган маблағларнинг 10 фоизи ҳисобот ойидан кейинги ойнинг 10-санасигача туман бюджетлари орқали тегишли жамғармаларга ёъналтирилади.
2023 йил 1 мартгача мол-мулк ва ер солиғи бўйича ҳисобланган, тўланган маблағлар ва солиқ қарздорликлари тўғрисидаги маълумотлардан маҳаллалар реал вақт режимида фойдаланиш имконияти яратилади.
Ўз ўрнида “Маҳалла бюджети” тизими асосида шакллантирилган маблағлар “Фуқароларнинг ўзини ўзи бошқариш органлари тўғрисида”ги қонунда назарда тутилган фуқаролар йиғини кенгаши томонидан бошқарилади.
Изоҳ (0)