“Дарё” нашри 1 мартда Ўзбекистон ва жаҳонда содир бўлган энг муҳим воқеаларни эътиборингизга ҳавола этади.
Украина ва Россиянинг шиддатли жанг майдони, Бахмутдан чекиниш
Бир неча ойдан жанглар кечаётган Донецкдаги Бахмут шаҳридан украиналик ҳарбийлар “стратегик чекиниш”ни бошлаши мумкин. Бу ҳақда Украина президентининг иқтисодий масалалар бўйича маслаҳатчиси Александр Роднянский CNN телеканалига маълум қилди.
Хабарга кўра, Россия ҳозир Бахмутни ўраб олишга уринмоқда ва бунинг учун улар энг сара ъВагнеръ бўлинмаларидан фойдаланяпти
“Кўринишидан, улар жуда яхши ўқитилган ва катта тажрибага эга. Бизнинг армиямиз барча вариантларни кўриб чиқишга уринади. Улар ҳозирча шаҳарни ушлаб турибди, лекин керак бўлса, стратегик орқага чекинади, чунки биз одамларнинг барчасини бекордан бекорга қурбон қилмоқчи эмасмиз”, — деган маслаҳатчи. Унинг таъкидлашича, чекиниш ҳақидаги қарор Украина ҳарбийларининг ихтиёрида қолмоқда.
Манбанинг қайд этишича, Бахмутдан ғарбдаги ҳудуд мустаҳкамланган, шунинг учун Украина Қуролли кучлари шаҳардан чекинган тақдирда ҳам, Россия кучлари тезда олдинга силжий олмайди.
Ҳозирда Россия Бахмутни эгаллаш учун кучли тажрибага эга Вагнер жангчиларидан фойдаланаётган бўлса, Украина Қуролли кучларининг ҳарбий салоҳияти қай даражада?
CNN хабарига кўра, февраль ойида АҚШ Мудофаа вазирлиги 1000 дан ортиқ украиналик ҳарбийларни жангга тайёрлади.
Хусусан, Оклахома штатидаги Форт-Силлда Патриот ҳаво мудофаа тизими билан ишловчи гуруҳ тайёрланмоқда ва улар тез орада тайёргарликни якунлаб ортга қайтадилар.
Бугунгача Украина ҳарбийлари Буюк Британия, Германия, Дания ва Польша каби бошқа Ғарб давлатларида ҳам ўқитилмоқда.
Хусусан Германиядаги Украина аскарлари Леопард 2 танкини бошқаришни ўрганаётган бўлса, Буюк Британиядаги украиналик учувчилар эса Ғарб жанговар самолётларида машқ қилишни бошлаган.
Европа Иттифоқи давлатлари атом энергетикасини мустаҳкамлаш учун бирлашмоқчи, Россия бунда қайси йўлдан боради?
Болгария, Хорватия, Чехия, Финляндия, Франция, Венгрия, Нидерландия, Польша, Руминия, Словакия ва Словения мавжуд атом станциялари билан бир қаторда “янги лойиҳаларни қўллаб-қувватлашга” келишиб олди. Бу ҳақда Стокгольмдаги Европа Иттифоқи энергетика вазирлари йиғилиши баёнотида хабар берилди.
Мисол учун, узоқ вақтдан бери атом энергиясига таяниб келган Франция Европа атом энергетикаси бўйича яқинроқ алоқаларни ўрнатишга ҳаракат қилмоқда. Франциянинг мақсади “Ядровий иттифоқ яратиш” ҳисобланади.
Аммо бу масалага бир қанча давлатлар кескин қаршилик кўрсатмоқда. Танқидлар асосан Германия ва Испания томонидан бўляпти.
Ҳозирда Европа Иттифоқи электр энергияси бозорини ислоҳ қилиш масаласини муҳокама қилмоқда. Блок бу борада ҳали бир тўхтамга келмади.
Европа давлатлари келажак учун ҳимоя режасини тузаётган айни вазиятда нефть эмбаргосига учраган Россия Ҳиндистонга максимал миқдорда нефть етказмоқда. Bloomberg маълумотларига кўра, февраль ойида Нью-Деҳли Россиядан кунига тахминан 1,85 миллион баррел нефть импорт қилган.
Денгиздаги нефть таъминоти учун нарх чегараси кучга киргандан сўнг, Россия ресурсининг катта қисми Хитой ва Ҳиндистонга йўналтирилди.
Bloomberg маълумотларига кўра, Ҳиндистон нефтни Россиядан чегирма билан сотиб олади ва қайта ишлангач, ёнилғини Европага жўнатади.
Ўзбекистонга кириб келаётган АҚШ ва Россия ҳамкорликлари
Тошкентда 1 март куни Ўзбекистон—АҚШ музокаралари бошланди. Ташрифдан кўзланган асосий мақсад Ўзбекистон—АҚШ стратегик шериклигини янада ривожлантириш масалаларини муҳокама қилиш.
"Бизнес алмашинувлари учун қулай шароитлар яратиш, Ўзбекистон кадрлар салоҳиятини ошириш, Марказий Осиёда минтақавий хавфсизликни мустаҳкамлаш ва бошқа қатор масалалар бўйича ҳаракатларимизни бирлаштиришга келишиб олдик”,– деб ёзади Ташқи ишлар вазири вазифасини бажарувчи Бахтиёр Саидов ўз Telegram каналида.
Бу АҚШ давлат котибининг Ўзбекистонга биринчи ташрифи ҳисобланади. Ушбу ташрифдан аввал Блинкен Қозоғистоннинг Остона шаҳрида “C5+1” форматидаги (Марказий Осиё + АҚШ) учрашувда иштирок этди.
Ушбу йиғилишда АҚШ ва Марказий Осиёнинг 5 та давлати, хусусан Ўзбекистон ҳам иқтисодий, энергетика, атроф-муҳит ва хавфсизлик соҳасидаги ҳамкорлик масалаларини муҳокама қилган.
Шу билан бирга Ўзбекистонга ҳамкорликлар учун кириб келаётган давлат фақат АҚШ гина эмас.
Пойтахт ҳокимлиги матбуот хизматининг хабарига кўра, Россиянинг LLК-International компанияси Тошкент йўлларини таъмирлашга ёрдам беради. Бунга Тошкент шаҳар ҳокими вазифасини бажарувчи Бахтиёр Раҳмонов ҳамда LLК-International мутасаддилари билан учрашувда келишилди.
Бундан ташқари “Росатом” корпорацияси, электроэнергетика тизимини модернизация қилиш учун Тошкентга мутахассисларни юбориши маълум қилинган.
Изоҳ (0)