Ўзбекистонда инфляция даражаси яқин йилларда 5 фоизга пасаяди. Бу ҳақда Марказий банк маълум қилди.
Таҳлил қилинишича, пул-кредит шароитларида қатъийлик сақлаб қолиниши жорий йил иккинчи ярмида инфляциянинг пасаювчи трендга ўтишига хизмат қилади.
“Янгиланган прогнозларга кўра, 2025 йил якунига қадар умумий инфляция кўрсаткичи 8 фоизга яқин даражада шаклланиши кутилмоқда. Март ойида аҳолининг инфляцион кутилмалари ўтган ойга нисбатан 1,1 фоиз бандга пасайиб, 14,2 фоизга, тадбиркорлар кутилмалари 0,8 фоиз бандга секинлашиб, 13 фоизга тенг бўлди. Ёқилғи ва энергия таъминоти яхшиланиши ҳамда алмашув курсининг нисбатан барқарор шаклланиши таъсирида аҳоли ва тадбиркорларнинг инфляцион кутилмалари март ойида пасайишига қарамасдан, жорий инфляция кўрсаткичларидан юқори даражада сақланиб қолмоқда. Келгусида нархларга оширувчи босим кўрсатиши мумкин бўлган асосий омиллар сифатида коммунал хизматлар, ёқилғи ва энергия ресурслари қимматлашиши, валюта курси ўзгариши ҳамда транспорт харажатлари ошишини таъкидлаганлар кўпчиликни ташкил этган бўлса-да, уларнинг улуши аввалги ойга нисбатан бир оз камайган”, дейилади ҳисоботда.
Қайд этилишича, сўнгги чоракларда ташқи ноаниқликларнинг ортиб бораётгани ва уларнинг ички вазиятга таъсирлари кучаяётгани сабабли инфляцион кутилмалар даражаларида тарқоқлик ошиб бормоқда.
Марказий банк жорий йил майда энергия нархлари ўтган йилдагига нисбатан пастроқ оширилгани учун йиллик инфляция секинлашишига хизмат қилишига урғу берган.
“Шунга қарамай, кутилаётган энергия нархлари оширилишининг навбатдаги босқичи инфляция ва инфляцион кутилмаларга иккиламчи таъсирлари сезиларли даражада шаклланиши бўйича хатарлар сақланиб қолмоқда. Бунда, ишлаб чиқариш ва етказиб бериш билан боғлиқ таклиф омилларининг барқарорлашишида ёқилғи ва энергия таъминоти узлуксизлигининг таъминланиши муҳим аҳамият касб этади”, дейилади шарҳда.
Шу билан бирга, таҳлилда ташқи ноаниқликлар кучайиб бориши билан боғлиқ хатарлар глобал истеъмол нархларининг ҳамда ишлаб чиқариш харажатларининг ошишига ҳамда ташқи инфляцион босимларнинг кучайишига олиб келиши мумкинлиги қайд этилган.
“Сўнгги ойларда ташқи савдонинг мақбуллашиши, асосий савдо ҳамкорлар валюта курсларининг мустаҳкамланиши ҳамда сўм алмашув курсининг нисбатан барқарорлиги фонида алмашув курси томонидан келгуси ойларда инфляцияга босимлар кутилмаяпти. Шунингдек, кредитлаш суръатларининг тезлашиши ҳамда инвестицион фаолликнинг ошиши ялпи талабни қўллаб-қувватловчи таъсирга эга бўлмоқда”, дея масалани шарҳлаган Марказий банк.
Прогнозларга кўра, 2026 йилда республикадаги инфляция даражаси 5–6 фоиз, 2027 йил якунигача 5 фоиз даражасида шаклланиши кутилмоқда.
Аввалроқ жорий йил якунида умумий инфляция 7 фоизгача пасайиши мумкинлиги прогноз қилинганди
Изоҳ (0)