Олий Мажлис Қонунчилик палатасининг мажлисида Вазирлар Маҳкамасининг “Ўзбекистон — 2030” стратегиясини “Ёшлар ва бизнесни қўллаб-қувватлаш йили”да амалга оширишга оид давлат дастурининг 2024 йил якунлари ижроси юзасидан ҳисоботи муҳокама қилинди.
Бош вазир ўринбосари Жамшид Қўчқоровнинг ахборотига кўра, 2024 йил якунида ялпи ички маҳсулотнинг ўсиши ўтган йилга нисбатан 6,5 фоизни ташкил қилган.
“Давлат бюджети даромадлари 274,4 триллион сўмга етиб, 18,4 фоизга кўпайди. Йиллик инфляция даражаси 9,8 фоизни ташкил этди”, деди Қўчқоров.
Таъкидланишича, хорижий инвестициялар ҳажми аввалги йилга нисбатан қарийб 1,6 фоизга кўпайишига эришилган. Экспорт илк бор 27 миллиард долларга етган. Тоғ-кон, нефть-газ, кимё, қишлоқ хўжалиги соҳаларида инвестициялар ҳажми икки баробар кўпайган.
Таълим тизимини янги босқичга кўтариш мақсадида 76 фоиз болалар мактабгача таълим билан қамраб олинган. 115 та нодавлат умумий ўрта таълим ташкилоти ташкил этилган. Олий таълим муассасаларида 91 та талабалар турар жойларини барпо этиш лойиҳаси амалга оширилган.
Аҳолини тиббий жиҳатдан қўллаб-қувватлаш мақсадида 40 ёшдан ошган 10 миллиондан ортиқ аҳоли ҳамда 8 млн 162 минг нафар болалар оммавий скрининг текширувидан ўтказилган. Хотин-қизларнинг ҳуқуқ ва манфаатларини таъминлаш мақсадида 197,7 минг нафар хотин-қизга 3,3 трлн сўм кредит ажратилган, 548,8 минг нафарининг бандлиги таъминланган.
“Яшил макон” умуммиллий лойиҳаси доирасида республика бўйича 225,9 млн туп дарахт ва бута кўчатлари экилган, яшил боғлар сони 444 тага етказилган. Муҳокамалар якунида Вазирлар Маҳкамасининг ҳисоботи маъқулланиб, ҳукуматнинг тегишли фаолияти самарадорлигини оширишга қаратилган таклифлар акс этган тегишли қарор қабул қилинди.
Аввалроқ 2024 йилда Ўзбекистон ялпи ички маҳсулоти 115 млрд долларга етгани хабар қилинганди.
Статистика агентлиги маълумотларига кўра, 2024 йил якунида Ўзбекистон аҳолиси сони 37 миллион 543 минг нафардан ортган. Шунда ЯИМ миқдори аҳоли жон бошига камида 3 минг доллардан тўғри келади.
2023 йил ноябрда 2024 йилги иқтисодий ўсиш 5,6-5,8 фоиз атрофида бўлиб, 1,3 квадриллион сўмга етиши прогноз қилинганди.
Изоҳ (0)