Kino olami faqat qiziqarli syujet va aktyorlar o‘yini bilan emas, balki yurakni titratadigan musiqalari bilan ham yodda qoladi. Ba’zan birgina saundtrek butun film ruhini ochib berishi, sahnalarga chuqur ma’no qo‘shishi va tomoshabinni o‘sha lahzalarga qayta-qayta olib borishi mumkin. Yillar o‘tgan bo‘lsa-da, ayrim qo‘shiqlar hanuz tinglovchi qalbini junbishga keltiradi. Quyidagi ro‘yxatda nafaqat kino, balki musiqa tarixini ham o‘zgartirgan o‘nta afsonaviy saundtrek jamlangan.
“My Heart Will Go On” — “Titanik” (1997)
Selin Dion ijrosidagi ballada “Titanik” filmining yuragi bo‘ldi. Fojia va g‘amga to‘la bu qo‘shiq Jek va Rouzning abadiy sevgisini ifodalaydi. Jeyms Horner bastalagan ohang film davomida yangrab, voqealarga yanada ko‘proq dramatizm qo‘shadi. Mashhur qo‘shiq “Oskar” va “Gremmi” mukofotlarini qo‘lga kiritgan.
“Eye of the Tiger” — “Rokki 3” (1982)
Survivor guruhi tomonidan Silvestr Stallonening iltimosiga binoan yozilgan bu rok-gimn iroda va hayot sinovlarini yengib o‘tish haqida. Rokki Balboaning jangovar ruhini aynan shu qo‘shiq ochib beradi.
“Stayin’ Alive” — “Shanba oqshomi vasvasasi” (1977)
Bee Gees guruhining bu disko-hiti bir necha avlodning sevimli kuyiga aylandi. U Toni Maneroning qadamlariga ritm beradi va 70-yillardagi Nyu York muhitini aks ettiradi.
“I Will Always Love You” — “Tansoqchi” (1992)
Dastlab Doli Parton tomonidan yozilgan bu qo‘shiq Uitni Hyuston ijrosida yangicha ko‘rinish oldi. Uning kuchli va yurakni titratadigan ovozi film qahramonlari orasidagi sevgi dramasini mukammal aks ettirdi. Qo‘shiq dunyo bo‘ylab xitga aylandi, mukofotlarga sazovor bo‘ldi va kino tarixidagi eng ta’sirli saundtreklardan biriga aylandi.
“The Imperial March” — “Yulduzlar jangi: imperiyaning javob zarbasi” (1980)
Kompozitor Jon Uilyams tomonidan yaratilgan bu qo‘shiq Dart Veyder obrazining mavzusidir. U birinchi eshitishda taniladigan, kuch va xavfni ifodalovchi musiqadir.
“Lose Yourself” — “8 milya” (2002)
Eminem ijrosidagi bu qo‘shiq qo‘rquvlar, qat’iyat va imkoniyat uchun kurash haqidadir. U film uchun maxsus yozilgan bo‘lib, kambag‘allikdan chiqishga harakat qilayotgan yosh reper haqidagi syujetga mos keladi. Trek “Oskar” mukofotini olgan.
“Time” — “Ibtido” (2010)
Hans Zimmerning bu gipnotik kompozitsiyasi filmda vaqtni asosiy dushman va ittifoqchi ekanligini haqidagi hislarni kuchaytiradi. Uning sekin-asta kuchayishi ayniqsa film finalida kuchli ta’sir qiladi.
“Mrs. Robinson” — “Bitiruvchi” (1967)
Simon & Garfunkel dueti ijrosidagi bu qo‘shiq yoshlik inqirozi va jamiyat qoidalariga qarshi kurashning saundtrekiga aylandi. Qo‘shiq bosh qahramonning hayot yo‘lidagi tanlovi va betartiblik o‘rtasidagi kurashini ajoyib ifodalaydi.
“Don’t You (Forget About Me)” — “Nonushta klubi” (1985)
Simple Minds guruhi ijrosidagi bu qo‘shiq 1980-yillardagi yoshlar madaniyatining ramziga aylangan. “Nonushta klubi” (The Breakfast Club) filmi uchun maxsus yozilgan ushbu saundtrekda yolg‘izlik, o‘zini anglash va tengdoshlar orasida o‘rnini topish kabi mavzularni teran ochib beradi.
“He’s a Pirate” — “Karib dengizi qaroqchilari” (2003)
Jek Chittak obrazining musiqasi dengiz sarguzashtlari ruhi bilan to‘la jo‘shqin kuydir. Film qahramoni kabi yodda qoladigan ushbu musiqiy asarni kompozitor Klaus Badelt va Hans Zimmer hamkorlikda yaratgan.
Izoh (1)
Энг зури - "Хороший, плохой и злой " даги саунтрек!!!