29-сентябрдан 2-октябрга қадар Ўзбекистонда “Ипак йўли дурдонаси” XV Тошкент халқаро кинофестивали бўлиб ўтади.
Ўзбекистон учун “Ипак йўли дурдонаси” Тошкент халқаро кинофестивалини ўтказиш яхши анъанага айланиб бормоқда, бу кенг кўламли тадбир қайта тикланганидан буён учинчи йилдирки, бутун дунё киноижодкорларини бирлаштирмоқда. Ўтган йили фестивалда 500 дан ортиқ кино ижодкорлари иштирок этган эди. Бу йил тадбир кўлами бундан ҳам кенг бўлиши кутилмоқда. Тадбирлар пойтахтда ҳам, Самарқандда ҳам бўлиб ўтади. Бугундан кинофестиваль ўз ишини бошлади.
— Икки йил аввал президент томонидан Тошкент кинофестивалининг тикланиши
ўзбек маданий ҳаётининг том маънодаги тимсоли бўлмоқда. Жорий йилда 52 давлатдан ташриф буюрган 300 га яқин меҳмонлар орасида режиссёр актёр ва продюсерлар билан биргаликда ишончли ҳамкорлар бор. 30 га яқин давлатлар билан ҳамкорликда кинолойиҳалар амалга оширяпмиз.
Бу йил фестиваль доирасида Худойберган Девонов томонидан суратга олинган дастлабки фильмнинг 115 йиллиги, ўзбек миллий дубляж санъатининг 85 йиллиги ва Тошкент кинофестивалининг 65 йиллиги каби муҳим воқеаларни бирлаштиришга ҳаракат қилдик, — деди Кинематография агентлиги директори Фирдавс Абдухолиқов.
Фестивальда Россия, Қозоғистон, Исроил, Хорватия, Япония, Польша, Франция, Латвия, Чили, Корея, Эстония, Германия, Португалия, Сингапур, Украина ва бошқа 30 дан ортиқ давлатдан кино ижодкорлари иштирок этади.
Бу йилги тадбирлар дастури қизиқарли воқеликларга бой бўлиши кутилмоқда. Кино залларида 50 га яқин фильмлар намойиш этилади. Ижодий учрашувлар, маҳорат дарслари, муҳокамалар режалаштирилган. Режиссёрлар Эмир Кустуриса, Ҳасан Назер, Абдул Латиф Салазар, Кшиштоф Занусси, Александр Сокуров, Жаник Файзиев, актриса Елизавета Боярская, “Такси” фильми юлдузлари Сами Насери Фредерик Диефентал ва бошқа кўплаб кино олами юлдузларининг фестивалга ташрифи режалаштирилган.
Шунингдек, Маданият кунлари, Бутунжаҳон кино кунлари, Европа Иттифоқи мамлакатлари кинофестивалини ўтказиш, фильмлар намойиши ва муҳокамалар ўтказилиши режалаштирилган. Тадбирларга кириш бепул.
Бундан ташқари, анъанага кўра, фестиваль арафасида “Кино 5 кун ичида” танловига старт берилди. Турли мамлакатлардан келган иштирокчилар қисқа вақт ичида ўз ижодий ишларини суратга олиб, ҳакамлар ҳайъатига тақдим этиши керак бўлади.
Фестивальнинг бу йилги маросими ўтган йилгига нисбатан анча ихчам ва камтарона ўтказилди. Унда ўзбек санъатининг энг кўзга кўринган вакиллари иштирок этиб, қизил йўлакдан ўтишди. Қизил йўлакдан ўтиш жараёнлари нақд уч соат давом этди. Ундан сўнг Миллий фильмлар танлови совриндорлари аниқланди.
Хусусан, Ҳошим Арслонов “101-рейс” фильмидаги роли учун “Энг яхши эркак” роли номинациясида ғолиб бўлди. Совринни марҳум актёрнинг ўғли россиялик актриса Елизавета Боярскаядан қабул қилиб олди.
“Энг яхши актриса” номинацияси бўйича Раъно Шодиева “Аёл қисмати” фильмидаги роли билан ғолиб бўлди.
Миллий фильмлар танловида “Энг яхши режиссёр” номинацияси бўйича Али Ҳамроев “Самарқандда қовун таровати” фильми билан ғолиб бўлди.
Миллий фильмлар танловида “Энг яхши фильм” номинацияси бўйича Қамара Камалованинг “Ким деяй сени” фильми ғолиб бўлди. Совринни Ўзбекистон Республикаси маданият вазири Озодбек Назарбеков топширди.
Миллий фильмлар танловида ҳакамлар ҳайъатининг махсус соврини билан режиссёр Зулфиқор Мусоқов “Ҳайрат” фильми учун тақдирланди.
Ижодкорларнинг қизил йўлакдан ўтиши билан боғлиқ репортажни қуйидаги видеода томоша қилишингиз мумкин:
Изоҳ (0)