Ўзбекистонда хизмат кўрсатган артист, Кино арбоблари уюшмаси раиси, актёр Матёқуб Матчонов XIV Тошкент халқаро кинофестивали доирасида ташкил этилган «Турк кино кунлари» ижодий кечасида турк актёрлари Бурак Ўзчивит, Нургул Ешилчай ва уларнинг ҳамкасблари билан юзага келган можаросига муносабат билдирди. Актёр, шунингдек, ўзбек қизлари ва аёлларининг турк актёри Бурак Ўзчивит билан кўришиб, расмга тушиш учун қилган ишларини кескин танқид қилди.
«Кинофестивалнинг қандай ўтгани ҳақида жуда кўп саволлар келяпти. Кинофестиваль яхши ўтди, кейин турк кино ижодкорлари нима сабабдан жанжал қилишди, деган саволлар келди ва шунга изоҳ бермайсизларми, дейишди. Бу уларнинг ички низолари, сабаби оддий бир мисол қилиб гапирадиган бўлсак, уйимизга 10 та меҳмон чақирадиган бўлсак, 8 тасига бошқача, 2 тасига бошқача илтифот кўрсатмаймиз. Қайсидир маънода бу бизнинг ҳам айбимиз. Ваҳоланки, бу ерда қолган 8 та ижодкорлар ҳам ниҳоятда катта-катта ижодкорлар эди, турк киносида мустақил ўрнига эга санъаткорлар.
Уларга беҳурматсизлик қилиш ниҳоятда ачинарли ҳол. Мен бошқа нарсани айтмоқчиман, Бурак Ўзчивит келди, қизил йўлакчадан ўтяпти, у ёққа, бу ёққа боряпти. Шуни орқасидан эргашиб, керак бўлса туфлисини ялашга тайёр бўлган ўзбек қизларини, аёлларимизни кўриб ачинарли ҳолатга тушдим. Наҳотки, шунчалик ўзларингизни ерга уриб ташлайсизлар, ғурур борми, ўзи сизларда? Ўша билан расмга тушаман, шуни олдига бораман, гаплашаман, ялиниб сал бўлса ҳам деб, ғурур борми, сизларда? Расмга ҳам тушдинг, кейин нима бўлади, ғалати ҳолатку, бир-иккитаси келса, ҳа, сиз билан расмга тушмаганим алам қиляптими, дейсан. Менга алам қилаётгани йўқ, алам қилаётгани ўша қизлар ўзбек қизларига, ўзбек аёлларига «хурмача» қилиқлар билан иснод келтиряпти.
Ҳайронман, шу қизларимизни, аёлларимизни турмуш ўртоғи, ака-укалари, оталари борми? Шу даражада бўладими, қўпол сўзларни ишлатмаяпман. Шунчалик ҳам қиладими, ким у, оддий сиз билан менга ўхшаган инсон. Яхши кўрасизми, майли ўйнаган ролини яхши кўринг, ваҳоланки, унақа фантастик актёр эмас у, фотомодель. Сал озгина кимлигимизни, у ёқда турмуш ўртоғимиз, отамиз, акамиз, укамиз, фарзандларимиз борлигини эсдан чиқармайлик. Бу фанатизм яхшиликка олиб келмайди, билиб олинглар. Бандадан кимнидир ясаш яхшиликка олиб келмайди, Аллоҳнинг мухлиси бўлинглар. Қаттиқ гапирган бўлсам узр, лекин бу ҳақиқат», — дейди актёр.
Мавзуга доир:
- Матёқуб Матчонов давлат ишидаги 3 млн ойлик билан қандай қилиб 120 минг долларлик BMW’да юргани ҳамда киноларда кўринмай қолишининг сабаби ҳақида (видео).
- Матёқуб Матчонов қамалишига сабаб бўлган «наша иши» ва «Тоштурма»даги кунлари ҳақида гапириб берди (видео).
- Матёқуб Матчонов Ҳошим Арслоновнинг театрга садоқати поймол қилингани ва ёши катта санъаткорларни четлаштираётган раҳбарлар ҳақида гапирди (видео).
- «Бошида Жаҳонгир Аҳмедовдан ранжидим». Матёқуб Матчонов «Илҳақ» фильмидаги раис ролини ижро қилмоқчи бўлгани, аммо шогирди ролни унга бермагани сабаби ҳақида (видео).
Изоҳ (0)