Алишер Навоий номидаги Ўзбекистон давлат академик катта театрида тўрт кун давом этган «PROlogue — 2018» халқаро кино фестивали ғолиб ва совриндорларини тақдирлаш ҳамда тантанали ёпилиш маросими бўлиб ўтди. Икки қисмга бўлинган мазкур тадбирдан журналист Феруз Муҳаммад «Дарё» учун махсус репортаж тайёрлади.
Тадбирнинг иккинчи қисмида фестиваль ғолиб ва совриндорларини тақдирлаш маросими бўлиб ўтди.
Халқаро кинофестивалнинг «Энг яхши қисқа метражли фильм» номинациясида Жанубий Кореялик режиссёр Чонг Гил Хан 2018 йилда суратга олинган «Менинг исмим» деб номланган қисқа метражли фильми билан ғолиб деб топилди.
«PROlogue — 2018»да «Энг яхши миллий қисқа метражли фильм» номинацияси ғолиби режиссёр Шокир Холиқовнинг «Чой» деб номланган картинаси бўлди.
«Энг яхши сценарий» номинацияси Клод Ле Пейп ҳамда Юбер Шарюэлларнинг «Кичкина фермер» фильмига насиб этди. Ушбу фильм Франциялик режиссёр Юбер Шарюэль томонидан 2017 йилда суратга олинган.
«PROlogue — 2018»нинг «Энг яхши актриса» номинацияси ўзбек режиссёрининг фильмида бош ролни ижро этган актрисага насиб этди. Бу номинация ғолиби режиссёр Сарвар Каримовнинг «Сарвқомат дилбарим» картинасида бош ролни ижро этган Мадина Талипбек бўлди. Ушбу картина Ўзбекистон ва Қирғизистон киноижодкорлари томонидан суратга олинган бўлиб, халқаро кинофестивалда Ўзбекистон номидан иштирок этган ягона тўлиқ метражли бадиий фильм эди.
Фестиваль меҳмонлари интизорлик билан кутган «Энг яхши актёр» номинацияси эса режиссёр Темирбек Бирназаров томонидан суратга олинган «Тунги авария» фильми бош рол ижрочиси Акилбек Абдикаликовга насиб этди.«Энг яхши оператор» дея Эронлик оператор Моҳаммед Факури режиссёр Саттар Чамани Голнинг «Голнеса» фильми учун тақдирланди.
Халқаро кинофестиваль ҳакамлари «Энг яхши режиссёр» номинацияси ғолиби дея «Мени ёлғиз қолдирма» картинаси режиссёри Айда Бегични эълон қилишди. «PROlogue — 2018»да Айда Бегич «Энг яхши фильм учун Гран При» мукофотига ҳам лойиқ кўрилди.
«Миллий кинематографияни ривожлантиришга қўшган улкан ҳиссаси учун»– режиссёр Қамара Камалова, Ўзбекистон халқ артисти, актёр Пўлат Саидқосимовлар ҳам тақдирланишди.
«Жаҳон кинематографиясни ривожлантиришга қўшган улкан ҳиссаси учун» учун эса Россиялик режиссёр Владимир Меншов тақдирланди.
«Қисқа метражли фильмлар халқаро ҳакамлар ҳайъатининг махсус соврини» «Устоз» фильми режиссёр Марс Оринбасаров ҳамда «Асан» фильми режиссёри Берик Жаҳановларга насиб этди.
PROlogue IV Халқаро кино фестивали Ўзбекистон Ёшлар иттифоқи томонидан «Ўзбеккино» миллий агентлиги, Тошкент шаҳар ҳокимлиги, Кинематографияни ривожлантириш маркази, Ёш кинематографлар кенгаши, Ўзбекистон миллий кинокомиссияси билан ҳамкорликда ташкил этилди.
Изоҳ (0)