Туркияда «Ўзбек киноси куни» бўлиб ўтди

8—12 ноябрь кунлари Туркияда бўлиб ўтаётган «Коркут ата халқаро кинофестивали»да таниқли ўзбек киноижодкорлари ҳам иштирок этмоқда.

Кеча кинофестиваль дастурида «Ўзбек киноси куни» ташкил этилди. Аввал «Ипак йўли дурдонаси» Тошкент халқаро кинофестивали ҳақида видеоролик тақдим этилди.

Табрик учун Ўзбекистон Кинематография агентлиги бош директори Фирдавс Абдухолиқов ҳамда Туркия Республикаси Маданият ва туризм вазири ўринбосари Аҳмет Демиркан сўзга чиқишди.

Кечада ўзбек миллий куй-қўшиқлари ва рақслари янгради. Маданий тадбир байрам тантанага айланиб кетди. Шунингдек, таниқли ўзбек кино ва эстрада юлдузларининг чиқишлари тақдим этилди.

Сўнгра, Кинематография агентлиги буюртмасига биноан суратга олинган режиссёр Рашид Маликовнинг «Тутқунлик» фильмининг премьераси бўлиб ўтди. Кечада ўзбек киноижодкорлари, Туркиядаги ватандошларимиз ва маҳаллий аҳоли ҳам иштирок этишди. Байрам барчага манзур бўлди.

11 ноябрдан Туркия миллий телеканалларида кинофестивалда намойиш этилган ўзбек фильмларининг ТВ премьералари ҳам бошланди.

Маълумот учун, кинофестивалда Ўзбекистон Кинематография агентлиги буюртмасига биноан суратга олинган режиссёр Али Ҳамраевнинг «Халқ жасорати», Жаҳонгир Аҳмедовнинг «Илҳақ» фильмлари ҳам намойиш этилди.

Кинематография агентлиги матбуот хизмати