Ўзбекистонда Болалар онко-гематология маркази ҳузурида Болалар саратони бўйича академик хаб ташкил қилинади. Бу ҳақда 7 май куни Шавкат Мирзиёев раислигида бўлиб ўтган видеоселектор йиғилишида маълум қилинди.
Йиғилишда қайд этилишича, Ўзбекистонда болалардаги онко-гематологик касалликларнинг ярмидан кўпи сўнгги босқичларда аниқланмоқда. Шу боис худди онкологияда бўлгани каби болалар саратонига қарши курашиш бўйича ҳам беш йиллик дастур қабул қилинади. Бунга камида 110 миллион доллар йўналтирилади.
Болалар онко-гематология маркази ҳузурида Болалар саратони бўйича академик хаб ташкил қилиниб, юқори малакали хорижий мутахассислар олиб келинади. Марказий Осиёда ягона бўладиган ушбу академик хабда минтақадаги шифокорлар болалар саратони касалликларини эрта аниқлаш ва даволаш бўйича халқаро стандартлар асосида ўқитилади.
Шунингдек, жойлардаги болалар шифохоналарининг онко-гематология бўлимлари касалликни эрта босқичда аниқлайдиган энг замонавий ускуналар билан жиҳозланади.
Президент бу ишларни ташкил қилиш бўйича тегишли қарор лойиҳасини киритишни топширди.
Ўзбекистонда болалар саратонига қарши кураш
Ўзбекистонда соғлиқни сақлаш тизимини ислоҳ қилиш давлат дастурлари доирасида болаларга онкологик, гематологик ва иммунологик ёрдам кўрсатишни яхшилашга алоҳида эътибор қаратилмоқда. Хусусан, Болалар гематологияси, онкологияси ва клиник иммунологияси марказини ташкил этиш, унинг кадрлар салоҳиятини ошириш, моддий-техник базасини мустаҳкамлаш ҳамда беморлар учун қулай шарт-шароитлар яратиш ва уларни зарур дори-дармонлар билан таъминлаш бўйича чора-тадбирлар амалга оширилди.
“Ўзбекистон-2030” стратегиясида онкологик касалликлар сабабли эрта ўлимни 2,5 баробарга қисқартириш вазифаси белгиланган. Жаҳон соғлиқни сақлаш ташкилотининг болалар саратонига қарши кураш бўйича глобал ташаббусида иштирок этиш доирасида 2030 йилгача онкологик касалликларга чалинган болаларнинг омон қолиш даражасини 60 фоизга ошириш мақсад қилинган.
2024 йилнинг майида “Онкологик, гематологик ва иммунологик касалликларга чалинган болаларга тиббий ёрдам кўрсатишни янада такомиллаштириш чора-тадбирлари тўғрисида”ги президент қарори қабул қилинганди. Унга кўра, Болалар гематологияси, онкологияси ва клиник иммунологияси маркази Болалар онкологияси, гематологияси ва иммунологияси илмий-амалий тиббиёт маркази этиб қайта номланди. Марказ ҳузурида Онкологик ва гематологик касалликларга чалинган болаларни соғломлаштиришга кўмаклашиш жамғармаси ташкил этилди.
Изоҳ (0)