Американинг Johnson & Johnson компанияси болалар упаси таркибида асбест борлиги ва у саратонни келтириб чиқариши мумкинлиги ҳақидаги даъволарни бартараф этиш учун 6,5 миллиард доллар товон тўлайди. Бу ҳақда CNBC хабар берди.
Суд жараёни натижасида даъвогарлар аллақачон компаниядан бир нечта йирик тўловларни олган. Жумладан, компания жамоавий даъво аризаси билан чиққан 22 нафар аёл фойдасига 2 миллиард долларга яқин товон пули тўлаган. Аёллар Johnson’s Baby Powder таркибидаги кансероген асбест тухумдон саратони ривожланишига сабаб бўлганини айтган. Компания бу даъволарни “уйдирма” деб атамоқда.
АҚШнинг 42 та штатида Johnson & Johnson’га қарши тергов бошланган. Бутун дунё бўйлаб компания ишлаб чиқарган болалар упасини сотиш тўхтатилган.
Johnson & Johnson 25 йил давомида 6,5 миллиард доллар тўлашни режалаштирмоқда. Компания ишлаб чиқарилиши тўхтатилган упа ва бошқа талк маҳсулотлари истеъмолчилар учун хавфсиз эканини таъкидлайди. J&J ва унинг шўба корхоналарига қарши қўзғатилган талк билан боғлиқ даъволарнинг тахминан 99 фоизи тухумдон саратони билан боғлиқ. Johnson & Johnson ўзининг LTL Management шўба корхонасини банкрот деб эълон қилиш орқали даъвони ҳал қилмоқчи.
Изоҳ (0)