Ўзбекистон Президентининг 27 майдаги қарори билан Республика ихтисослаштирилган гематология илмий-амалий тиббиёт маркази ҳузурида Болалар гематологияси, онкологияси ва клиник иммунологияси маркази ташкил этилади.
2022 йил 1 январдан мазкур марказ Республика ихтисослаштирилган гематология илмий-амалий тиббиёт маркази таркибидан чиқарилиб, мустақил фаолият юритади. Марказ фаолиятини ташкил этишга хорижий экспертлар ва етакчи илмий-тадқиқот муассасалари жалб қилинади.
Болалар гематологияси, онкологияси ва клиник иммунологияси маркази Тошкент шаҳар, Чилонзор тумани, Арнасой кўчасида янги барпо этилган тиббиёт муассасаси биноларидан бирига жойлаштирилади.
Шунингдек, қарорига кўра, 2021—2022 йилларда Қорақалпоғистон Республикаси ва вилоятлар болалар кўп тармоқли тиббиёт марказларининг болалар гематологияси бўлими негизида умумий штатлар ва стационар ўринлар доирасида Болалар гематологияси ва онкологияси бўлимлари ташкил этилади.
Республика ихтисослаштирилган гематология илмий-амалий тиббиёт маркази ҳам Тошкент шаҳар, Чилонзор тумани, Арнасой кўчасида янги барпо этилган тиббиёт муассасаси биноларидан бирига кўчиб ўтади. 300 ўринли бино 2021 йил 1 сентябрга қадар фойдаланишга топширилиши кутилмоқда. Унда катталар ва болалар учун алоҳида жарроҳлик, жонлантириш, интенсив терапия, трансфузиология ва трансплантология бўлимлари, шунингдек, радиодиагностика ва радиодаволаш бўлимлари, бактериологик лаборатория, махсус овқат тайёрлаш бўлинмаси, болаларга таълим олиш имконияти яратилади.
Ҳужжат билан суяк кўмиги ўзак ҳужайраларини кўчириб ўтказиш амалиётини биринчи босқичда Республика ихтисослаштирилган гематология илмий-амалий тиббиёт марказида, кейинчалик эса Болалар гематологияси, онкологияси ва клиник иммунологияси марказида ҳам жорий этиш режалаштирилган.
Республика ихтисослаштирилган онкология ва радиология илмий-амалий тиббиёт марказини Тошкент тиббиёт академияси клиникасининг бўш турган ҳудудида жойлаштириш режалаштирилмоқда. Бунинг учун хорижий экспертлар ва етакчи илмий-тадқиқот муассасалари жалб қилиниб, замонавий янги бино-иншоотлар комплекси қурилади.
Бунга ва онкология ёрдамини такомиллаштириш билан боғлиқ харажатлар учун давлат бюджетидан 2021 йилда қўшимча 60 миллиард сўм ҳамда 2022 йилдан бошлаб 125 миллиард сўмдан кам бўлмаган миқдорда маблағ ажратилади.
2022 йил 1 январдан бошлаб қизлар ва аёллар орасида онкологик касалликлар тарқалишининг олдини олиш ва эрта диагностика қилиш қуйидаги миллий дастурлар асосида амалга оширилади:
- 9-14 ёшдаги ўсмир қизларни одам папилломаси вирусига қарши вакцина билан эмлаш;
- 30-55 ёшдаги аёллар орасида бачадон бўйни ва 45-65 ёшдаги аёллар орасида кўкрак бези саратони скрининги.
«Онко-назорат» хоналари ташкил этилишига вилоят ҳокимлари шахсан масъул ва жавобгар. Ўз ҳудудларида гематологик ва онкологик касалликларни эрта аниқлаш ҳамда муваффақиятли даволаш кўрсаткичларининг ошиши, касаллик оқибатида юз берадиган ўлим ҳолатининг камайишига эришилганлиги улар фаолиятининг самарадорлигини баҳолашда асосий мезонлардан бири сифатида эътироф этилади.
2021 йил 1 июлдан бошлаб гематология, онкология, клиник иммунология, трансфузиология ва шу соҳадаги лаборатория йўналишлари бўйича ёш мутахассисларнинг хориждаги етакчи илмий ва тиббиёт марказлари иш жойларида малака ошириши ва стажировка ўташи билан боғлиқ харажатлар давлат бюджети ҳамда Онкогематологик ва даволаш қийин бўлган касалликларга чалинган беморларни соғломлаштиришга кўмаклашиш жамғармаси маблағлари ҳисобидан тўлиқ қоплаб берилади.
Шу санадан бошлаб беморларнинг онкология ва гематологияга ихтисослаштирилган давлат тиббиёт муассасалари йўлланмалари асосида позитрон-эмиссион томография текширувидан ўтиши билан боғлиқ харажатлари давлат бюджетидан қопланади. Бундан ташқари, онкологик ва гематологик беморларнинг Қорақалпоғистон Республикаси ва вилоятлардан республика ихтисослаштирилган марказларига темир йўл ва авиатранспорт воситалари орқали келиши билан боғлиқ харажатлар тегишли маҳаллий бюджетлар маблағлари ҳисобидан тўлиқ қоплаб берилади.
Соғлиқни сақлаш вазирлигига икки ой муддатда гематология ва онкология касалликларини даволашда фойдаланиладиган дори воситалари рўйхатини, уларнинг самарадорлигини ҳисобга олган ҳолда қайта кўриб чиқиш ва ҳар йили янгилаб бориш юклатилди. Уч ой муддатда эса онкологик беморларнинг даволаб бўлмайдиган босқичида уларга наркотик ва психотроп воситаларни буюриш тартибини соддалаштириш, шунингдек, оғриқ қолдирувчи наркотик ноинексион воситаларни амалиётга татбиқ этиш бўйича ҳукуматга таклиф киритиши лозим.
Эслатиб ўтамиз, май ойининг ўрталарида Шавкат Мирзиёев Республика Гематология ва онкология ва радиология марказига ташриф буюриб, беморлар ва уларнинг қариндошлари билан суҳбатлашганди. Президент Ўзбекистон онкологик хизматини яхшилаш бўйича топшириқлар берганди.
Изоҳ (0)