“Мен саратонга чалинган эмишман”. Товус рақси билан элга танилган ва 7 йиллик турмушидан ажрашган раққоса Ирода Исмоилова 40 ёшда (фото, видео)

Рақс — умри қисқа касблардан бири. Раққосалар карьерани жуда эрта бошлайди ва уларнинг аксарияти 30 ёшдан кейин саҳнадаги фаолиятига якун ясайди. Товус рақси билан танилган раққоса Ирода Исмоилова ҳали бери саҳнадаги фаолиятига якун ясаш ниятида эмас. Чунки унинг ижодига талаб юқори, 40 ёшда бўлса-да, ҳамон ёш раққосалар сингари жозибасини йўқотгани йўқ.

“Онам шифокор бўлишимни истаган”

Ирода Исмоилова бежиз рақс санъатига қизиқмаган. Бу санъат оила аъзоларига бегона эмас. Ота-онаси хореограф сифатида фаолият юритган.

— Оилада икки фарзандмиз. Мен туғилганимда онам хореография олий мактабида ўқиган, дадам эса ансамблда ишлаган экан. Онам чақалоқлигимдан мени аравачага солиб ўзи билан олиб кетар, дадам раҳматли машғулотлардан сўнг мени олиб уйга қайтаркан. Шу боис рақс менга ҳеч қачон бегона бўлмаган. Уч ёшдан у билан жиддий шуғулланишни бошлаганман. Ансaмблдаги раққос ва раққосаларнинг бари худди яқинларимдек эди.

Онам раққоса бўлса-да, негадир бу касбни эгаллашимга жиддий қаршилик қилган. “Шифокор бўлишини истайман”, деб кўп айтарди. Балки ўзи касби сабаб қийналгани учундир. Дадам эса ёнимни олиб “Ўзи ёқтирган ишни қилсин, бир умр қийналиб яшамайди-ку”, дерди, — дейди Ирода Исмоилова.

“Болалигим қандай ўтганини эслолмайман”

Ирода Исмоилова болаликдан қийинчиликда улғайгани, оддий болалар сингари ўйнаб-кулмагани ҳақида сўзлаб берди.

— Ота-онам ишларди, аммо рўзғоримиз ҳеч қачон бут бўлмасди. Камтарона, оддий ҳаёт кечирардик. Бунга сабаб ансамблда оладиган ойлик билан рўзғор тебратиб бўлмасди. Машғулотлар учун керакли бўлган ҳамма нарсани аввалдан ота-онамга айтиб, оилавий режага киритардик. Чунки улар айтилган заҳоти харажат қила олмасди.

Болалигим қандай ўтганлигини эслай олмайман. Чунки бирор марта кўчага чиқиб ўйнаганимни, дугоналарим билан айлангани борганимни эслолмайман. Мен фақат хореография мактаби ва уйни билардим холос. Баъзан рақс санъатига паст назар билан қарашса, “ўйнаб пул топасизлар” дейишса ранжийман. Чунки профессионал раққоса бўлиш учун йиллаб меҳнат қилиш ва жисмоний оғриқларни ҳис қилиш керак. Мактабда ўқиб юрган пайтим оғриқдан оёқларим тинимсиз оғрирди, уйга боргунча ухлаб қолай дердим, — дейди Ирода Исмоилова.

“Ҳамиша дадам қўллаб-қувватларди”

Раққоса онасининг қаттиққўл бўлгани ва кўп масалада отаси қўллаб-қувватлагани ҳақида гапирди.

— Онам шу қадар қаттиққўл эдики, пардоз қилишимни ҳам истамасди. Касб нуқтайи назаридан раққосалар, пардоз қилишга мажбур, аммо онам ҳамиша қарши бўларди. Ҳар қандай масалада мени қўллаб-қувватлайдиган инсон дадам бўлган. Ҳатто, онам уй ишларини буюрганида, “Қилмасин, қизим чарчади, рақсга тушиш осонми”, дейдиган инсон ҳам дадам эди.  Дарсдан кейин мен идиш-товоқларни ювмаслигим учун ўзи бу ишни қиларди.

Товус рақси либосининг яратилишида ҳам дадамнинг ҳиссаси катта бўлган. У асосини ўзи симлардан ясаб берганди, — дейди Ирода Исмоилова.

“Товус рақси бошқа раққосага аталганди”

Ирода Исмоилова товус рақси учун Маъмура Эргашевадан миннатдор эканлиги ва аслида бу рақс бошқа раққоса учун аталгани ҳақида айтиб ўтди.

— Аслида бу рақс бошқа раққоса учун аталган экан. Аммо унинг ижроси унчалик оммалашмаган. Кейин мен ижро этдим ва кутилмаганда машҳурликка эришди. Бу рақснинг яратилганига 20 йилдан кўпроқ вақт бўлди. Ҳалигача одамлар шу рақсни сўрашади. Ўтган вақт мобайнида унга 8 та махсус либос яратилди. Бу рақснинг либослари ниҳоятда оғир, бош кийимининг ўзи 2 килограмм тош босади, — дейди Ирода Исмоилова.

“Турмуш қуролмайман деб ўйлардим”

Ирода Исмоилова турмуш ўртоғи билан тасодифан танишгани ва шахсий ҳаётида ўзгаришлар ижодига қандай таъсир этгани ҳақида гапирди.

— Эрта эмас, 27 ёшда оила қурдим. Ростини айтсам, оила қуролмасам керак, деб кўп ўйлардим. Чунки ёшим катта бўлиб қолган, унинг устига кўп ўзбек йигитлари санъаткорга уйланишни истамайди, деб ҳисоблардим. Собиқ турмуш ўртоғим билан учрашувга чиқишдан аввал бир ой гаплашиб юрганмиз. Раққоса эканлигимни яширмаганман. У инсон мендан икки ёш кичкина эди. Фикрлари замонавий эканлигини пайқаб оила қуришга қарор қилганман. Аммо дадам раҳматли қарши бўлган. Етти йил бирга яшадик, икки фарзандли бўлдик. Аммо оиламизнинг якуни гўзал бўлмади, — дейди Ирода Исмоилова.

“Рақс сабаб ҳомиламдан айрилдим”

Ирода Исмоилова бир муддат санъатдан кетишига фарзандидан айрилгани ва руҳий тушкунликка тушиб қолгани сабаб бўлгани ҳақида айтиб ўтди.

— Ҳомиладор бўлганимдан кейин ҳам санъатдан кетганим йўқ. Аввалига ҳаммаси яхши эди. Туғуруқ вақти яқинлашганида бирдан тобим қочиб иситмаладим. Шифокорга борсак, ҳомилам бир ой аввал нобуд бўлганини, тезлик билан уни жарроҳлик йўли билан олиб ташлаш кераклигини айтди. Руҳий тушкунликка тушиб қолдим. Аммо баъзан бошқа шифокорга ҳам учрашмаганимга афсусланаман. Чунки нобуд бўлганига бир ой бўлган ҳомила чириб кетиши, у шифокор ваҳима қилгани ҳақида айтишади. Балки ҳомиланинг аҳволи у қадар ёмон бўлмагандир, деб ўйлаб қоламан. Биринчи ҳомиланинг нобуд бўлиши жуда оғир кечар экан. Руҳий тушкунликка тушиб қолганман. Санъатдан кетиш ҳақида ҳам ўйлаганман. Чунки шифокорлар боланинг нобуд бўлишига рақс ҳаракатлари сабаб бўлгани ва ўзимни аямаганлигимни айтганди, — дейди Ирода Исмоилова.

“Мен бачадон саратонига чалинибман”

Таниқли раққоса Ирода Исмоилова “Мирсодиқова билан” YouTube каналига берган интервьюсида етти йиллик турмушидан ажрашаётгани ҳамда бунга туртки бўлган сабаб ҳақида гапириб берди.

— Бу вазиятда ҳеч кимни айблай олмайман. Биринчидан, қарс икки қўлдан чиқади, дейишади. Иккинчидан, бу тақдир. Бу мавзунинг давом этмаслик сабабини айтадиган бўлсам, ҳали собиқ эмас, турмуш ўртоғим бошқа аёл билан турмуш қурдилар, менимча, фарзанд ҳам кутишяпти. Уларнинг бахтли бўлишини хоҳлайман. У аёлнинг ҳеч қандай айби йўқ.

Мен ҳеч қачон кўрмаганман, қўлим билан ушламаганман. Битта сабаб бўлган. Уларнинг ёзишмасини кўриб қолганман. У ерда эрим ‘Менинг аёлим бачадон саратони билан касалланган’, деб ёзган. Шуни кечира олмадим, бўлди. Менга хиёнат қилдилар, деб айта олмайман. Саратон дегани, мен ҳар куни эрталаб туриб сенга ўлим тилайман, дегани. Нима учун? — дейди раққоса.

“Мен яна ижодга қайтдим”

Ирода Исмоилова ажрашганидан кейин руҳий тушкунликка тушгани ва унинг ижодга қайтишига маъмури сабаб бўлгани ҳақида гапирди.

— Оиламни сақлаб қолиш учун қўлимдан келганича ҳаракат қилдим. Ҳатто, “Майли, уйланинг қарши эмасман, менга эр бўлманг, аммо болаларга ота бўлиб қолинг”, деган кунларим ҳам бўлди. Чунки болаларим дадасини яхши кўради. Шуларни ўйлаб, руҳий тушкунликка тушиб қолдим. Шундай кунларнинг бирида маъмур синглим менга куч бағишлади. Мени қайтадан ижодга қайтишимга сабабчи бўлди. Унинг яхшилигини ҳеч қачон унутмайман, — дейди Ирода Исмоилова.

“Операцияга рози бўлмадим”

Юлдуз Усмонованинг “Шароб” қўшиғига моҳирлик билан рақсга тушган Ирода Исмоиловага хонанда юзини пластик операция қилдириши кераклигини айтгани ва жарроҳ билан таништиргани ҳақида сўзлаб берди.

— Юзимдаги нотекисликка косметика сабабчи эмас. Аввалдан юзим шундай бўлган. Бир куни Юлдуз Усмонова “Юзингни тўғрилатиш керак. Таниш пластик хирургим бор, қабулига олиб бораман”, деди. Клиникага бордик, таҳлилларни топшириб операция кунини белгиладик. Аммо қўрқдим ва бир неча кундан кейин рад жавобини бердим. Юлдуз опа ўшанда бир оз ранжигандек бўлди, — дейди Ирода Исмоилова.