“Интер” ўз тарихида еттинчи бор Европа Чемпионлар Лигаси (аввалги номи — Европа Чемпионлар Кубоги) финалига йўл олди. Бу ҳақда “Championat” нашри хабар берди.
Турнирнинг 2024/25 йилги мавсуми ярим финалида миланликлар том маънода тарих яратди. “Нерадзуррилар” икки ўйин натижасига кўра “Барселона”ни 7:6 ҳисобида мағлуб этиб, мусобақа финал чиптасига эга чиқди. Клуб бу орқали ўз тарихида 7 марта мазкур босқичда ўйнайдиган бўлди. “Интер” аввалги олти финалдан учтасида чемпион бўлган бўлса, уч марта имкониятни бой берган.
“Интер”нинг финалдаги ғалабалари:
• 1964 йил — “Реал Мадрид” устидан 3:1;
• 1965 йил — “Бенфика” устидан 1:0;
• 2010 йил — “Бавария” устидан 2:0.
“Интер”нинг финалдаги мағлубиятлари:
• 1967 йил — “Селтик”га 1:2;
• 1972 йил — “Аякс”га 0:2;
• 2023 йил — “Манчестер Сити”га 0:1.
Агар “Интер” жорий мавсумда чемпионликни қўлга киритса, бу клубнинг Чемпионлар Лигаси тарихидаги тўртинчи ғалабаси бўлади.
“Интер”нинг финалдаги рақиби ҳали аниқланмади — улар ҳал қилувчи ўйинда “Арсенал” ёки “ПСЖ”дан бири билан тўқнаш келади. Мазкур беллашув бугун, 7 май оқшомида Париждаги “Park de Prens” стадионида бўлиб ўтади. Учрашув 00:00 да бошланади.
Изоҳ (0)