Венгрия Европа Иттифоқи давлатлари билан биргаликда Украинага ёрдам беришга тайёр, деди бош вазир Виктор Орбан.
Шу билан бирга, у Украинани молиялаштириш Европа Иттифоқи бюджетига зарар келтирмаслиги кераклигини таъкидлади. Орбаннинг фикрича, Украина эҳтиёжлари учун тузиладиган ҳар қандай молиявий фонд Европа бюджетидан алоҳида бўлиши керак.
“Агар биз Украинага ёрдам беришни истасак ва буни қилишимиз керак деб ҳисобласак, буни Европа Иттифоқи бюджетига зарар келтирмайдиган тарзда қилишимиз лозим. Аммо Европа Иттифоқи бюджетидан тўрт йилга олдиндан 50 миллиард евро ажратиш Европа Иттифоқи суверенитети ва миллий манфаатларини бузиш ҳисобланади. Биз чорак йил ичида нима бўлишини ҳам билмаймиз”, - деди Орбан Словакия ҳукумати раҳбари Роберт Фицо билан бўлиб ўтган матбуот анжуманида.
Виктор Орбаннинг қайд этишича, агар Брюссел бу шартни қабул қилмаса, у ҳолда Будапешт Киевга ёрдам бериш бўйича келишув жараёнини тўхтатишга мажбур бўлади.
2023 йил декабрь ойи ўрталарида Венгрия бош вазири Украинага 50 миллиард евролик узоқ муддатли ёрдам дастури бўйича қарорга вето қўйди. Агар Киевга бериладиган ёрдам миқдори ҳар йили қайтадан кўриб чиқиладиган бўлса, Венгрия ветони бекор қилишга тайёр. Financial Times нашрининг ёзишича, Еврокомиссия бу талабларни бажаришга тайёр.
Изоҳ (0)