Европа Иттифоқи аъзолари Болгария ва Руминиянинг Шенген ҳудудига босқичма-босқич интеграциялашувини маъқулладилар. Европа Иттифоқи давлатлари 2024 йилнинг март ойидан бошлаб икки давлатнинг денгиз ва ҳаво чегараларида чегара назоратини бекор қилади. Назорат қуруқлик чегараларида қолади. Бу ҳақда Еврокомиссия матбуот хизмати маълум қилди.
“Бугун Болгария ва Руминия учун тарихий лаҳза. Руминия ва Болгария фуқаролари учун эса катта ғурур куни. Март ойидан бошлаб улар ички денгиз ва ҳаво чегараларини чегара назоратисиз эркин кесиб ўтишлари мумкин. Бу иккала мамлакат ва бутун Шенген ҳудуди учун олдинга қўйилган муҳим қадамдир”, — деди Европа комиссияси президенти Урсула фон дер Ляен.
Қайд этилишича, қуруқликдаги чегаралардаги шахсларни текширишни бекор қилиш санаси бўйича муҳокамалар 2024 йилда давом этади ва Европа Иттифоқининг бу борадаги қарори маълум вақт оралиғида қабул қилиниши кутилмоқда.
Болгария ва Руминия 2007 йилдан бери Шенген ҳудудининг бир қисми бўлиш учун ҳаракат қилмоқда. Европа комиссияси 2011 йилда икки давлатнинг Шенген ҳудудига тайёрлигини эълон қилган, бироқ бу жараён Иттифоқининг турли давлатлари томонидан блокланган эди.
ЕИ кенгаши 2022 йил декабрида қарор қабул қилиш тўғрисида келишиб олди, бироқ Австрия ноқонуний миграцияга қарши кураш бўйича икки мамлакатнинг “заиф ҳаракатлари” туфайли қарорга имзо қўймади.
2023 йилда эса Шенгенга қўшилиш қарори Венгрия томонидан блокланди, у Болгарияни рус газининг транзитига солиқ жорий қилгани учун танқид қилганди.
Изоҳ (0)